Nukissiorfiit 220 millionit koruuninik akiliisitaariaannaapput

Nukissiorfiit sanatitsisuupput, sanaartugassanillu suliassinneqartut tassaallutik Pihl & Søn, Danmarkimeersut.

Qorlortorsuarmi nukissiorfiup sananeqarnissaa isumaqatigiissutaammat 216 millionit koruuninik akeqarnissaa Nukissiorfiit Pihl & Sønillu akornanni isumaqatigiissutaavoq, Pihl & Sønilli 216 millionit koruunit saniatigut 220 millionit koruuninik maanna piumasaqalerput. Aningaasartuutit 220 millionit koruuninik ilaneqarsimasinnaanissaat qanoq ilinikkut pinngorpa? Nukissiorfiit pisortaat Svend Hardenberg aperaarput, akivorlu:

- Nalulluinnarparput, naatsorsueriaaserlu atorsimasaat aamma isumaqatiginngilarput, isornartorsiutaallu aamma isumaqatiginatigik, Nukissiorfiit pisortaat Svend Hardenberg Radioaviisimut oqarpoq, nangillunilu:

- Suliarinninnissamut isumaqatigiissut naapertorlugu Pihl & Søn 216 millionit koruunit nalinginut sanaartortussaavoq, sanaartukkallu naammassineqarnissaa aamma isumaqatigiissutaalluni. Qorlortuarsuarmili nukissiorfiup tunniunneqarnissaa kinguaattoorpoq, nukissiorfillu naammaginanngitsutut isikkoqartillugu tunniunneqarluni, Svend Hardenberg oqarpoq.

Isumaqatigiinngissutaasorli pillugu isumaqatigiissitsiniarnissaq Nukissiorfinnut ajoqutaassappat qanoq pisoqassava? Svend Hardenberg akivoq:

- Siullermik oqaatigissavara tamanna naatsorsuutiginnginnatsigu, 220 millionit koruuninilli akiliisariaqalissagutta pissutsit allanngorujussuassapput, Svend Hardenberg oqarpoq.

Qorlortorsuarmi nukissiorfik pillugu Nukissiorfiit aningaasartuuteqarnerulissappata Kujataani atuisunut kalluissanersoq nalunarallarpoq, Svend Hardenbergili oqarpoq atuisut tamanna naapertuilluanngitsutut nalilissagunaraat, Kujataanili atuisut akiliisariaqassanersut akiliisariaqassannginnersullunniit suli nalunarpoq.

Qorlortorsuarmi nukissiorfimmik sanaartortut Pihl & Søn Radioaviisimiit attaveqarfiginiaraluaratsigit iluatsinngilarput.