Nukappissat marluk inissinneqarfimminnit qimaagaluartut
Nukappissat marluk 14-inik aamma 17-inik ukiullit, Nuummi inissinneqarfimminnit angallammit ilinniarfiutigisumit Tûgdlik-mit tallimanngormat qimaagaluartut, Nuummi politiinit ullumi nassaarineqarput.
Allattoq Louise M. Kleemann
Politimester Sten Thomsen oqarpoq, ujarneqartut ullup qeqqata missaani Nuummi inissiat ilaanni politiinit nassaarineqartut, pinaasinngitsullu tigusarineqartut.
Atuagalliutini aqagu saqqummersussani allaaserisaq naapertorlugu nukappissat sapaatip akunnerata naanerani Røde Kors Børnehjemimi aamma Nuuk Transportimi pissarsiaqarpiaratik tillinniarsimapput.
14-inik ukiulik Ilulissani ungasinngitsukkut aallaasersoqataavoq, ukiukinninili pissutigalugu pillarneqarsinnaannginnami angallammi ilinniarfiutigisumi inissisimatinneqarluni. Nukappissap qimaaqataa 17-inik ukiulik aamma utertinneqareerpoq.