Nukappiaraq Upernavimmiu ilinniartitsissutissami pingaarnertut inuttaasoq
Ilinniartitsissutitut isiginnaagassialiaaraq nukappiaqqat qulinik ukiullit marluk aappa nunatsinniit Upernavimmeersoq aappaalu Danmarkimi Sorømeersoq ulluinnarni inuunerannik takutitsisuussussaaq.
Nukappiaqqat marluk taakku imminnut tikeraarput, kalaallit nunaannilu immiussinerit aasaq ingerlanneqarput.
Aasaq manna Lars Kristian Lynge pingaanertut inuttamit aappaannit qallunaavaqqamit Asger Skovgaard Boesenimit aamma qulinik ukiulimmit tikeraarneqarpoq.
Lars Kristian Lyngellu kammattaani Asger Skovgaard Boesen Sorømut aamma tikeraarpaa, ullumilu illoqarfimminut angerlaqqammerluni.
Tikeraarnerminnilu ulluinnarni inuunertik takutippaat:
- Asger atuarfianut pulaarama, aamma Asgerikkunnut pulaarama.
- Asgerikkut suuteqarpat?
- Kaniinat, aamma nuanneq orpiutaanni iipilit, Lars Kristian Lynge Upernavimmeersoq Danmarkimut aatsaat siullermeerluni tikeraaqqammisoq alutorsarsimaqisoq taama oqaluttuarpoq.
Palasi suleqataasoq
Juaanna Platou suliamut nunatsinniit suleqataavoq, Lars Kristian Lyngelu peqatigalugu Danmarkimi nukappiaqqap inuttaasup illoqarfianut tikeraaqataaqqammerpoq.
Arnaq taanna Upernavimmi palasitut atorfeqarpoq, filmiliamillu suliaqartut ikiorlugit nukappiaqqamik nunatsinneersumik toqqaasuuvoq:
- Tassa takutikkusunneqarput Kalaaliaqqap ulluinnaa aammaa qallunaavaqqap ulluinnaa qanoq assigiinngitsigisut, Juaanna Platou immiunneqartuni nukappiaqqap ilinniartitsisuatut sulisuusaartoq taama oqarpoq.
Misigisat nutaat
Nukappiararlu oqaluttuarpoq Danmarkimeeqqaarnermini aamma pissanganartunik misigisaqarsimalluni:
- Tivolerpunga taavalu uumasuusivimmiillunga.
- Nuannerpa?
- Ja, Lars Kristian Lynge KNR-mut taama oqarpoq.
Immiussat ipadikkut App-mit, tassa programmi qarasaasiatigut alakkarneqarsinnaasunngorlugu suliamit, isiginnaarneqarsinnaalerumaarpoq, Kalaallit Nunaannilu Danmarkimilu 4. klassiniit 6. klassinut qallunaatut aamma pinngortitamut teknologilerinermullu tunngasunut atuartitsinerni atorneqarsinnaalissalluni.
