Nukappiaraq tallimanik ukiulik annappoq
Nukappiaraq annaniummut ilaalluni Comorut qeqertaannukaanneqarpoq.
Timmisartoq nakkartoq 253-inik ilaasoqarpoq, mannalu tikillugu allanik annatoqarsimanersoq qulakkeerneqanngilaq.
Timmisartup nakkarfiata eqqaani annaassiniat ujaasipput, silalli ajornera annaassiniarnermut ajornakkusoortitsivoq.
Timmisartup nakkartup aseqquisa akornanni inuit ajunaartut timaat nassaarineqarput. Timmisartumi nakkartumi ilaasut amerlanersaat Frankrigiminnngaaneersuussangatinneqarput, aammalu qeqertanit Comorerninngaaneersuussangatinneqarlutik.
Timmisartoq nakkartoq sillimaniarnikkut isumannaatsuunersoq franskit angallanermut ministeriata qularnartoqartissimallugu oqarpoq.
Timmisartup 2007-mi misissorneqarneranut atatillugu kukkunerit arlallit naammattoorneqarsimasut, franskit ministeriat Domineque Bussereau oqarpoq.
Timmisartortitseqatigiit atorsinnaanngitsutut EU-mit nalilerneqartartut ilaattut timmisartoq nakkartoq allassimasuutigineqanngilaq, taamaattorli nakkutigineqarluartussatut inissisimalluni, nutaarsiassaqartitsivik AP taamatut nalunaarpoq.
Timmisartup nakkartup assinga Air Francep timmisartuutaa atlantikup imartaanut juunip ulluisa aallaqqaataani nakkarpoq, 228-inik ilaasoqarluni, ajunaartut ilagalugu arnaq qallunaaq.