Nukappiaraq Nuummiu piniartunngortoq

Amerikamiu filmiliortartoq Mike Magidson "Inuk" filmiliaralugu aallartikkami Ole Jørgen Hammeken inuttassatut eqqarsaatigisimanngikkaluarpaa allaammi pingaarnertut inuttaalluni Ikumamik ateqarnissaa takorloorsimanngivikkaluarlugu. Tamannali allanngortilluinnarneqarpoq.

Uteriiserluni akuersititsiniaaneq aqqusaaqqaarlugu Ole Jørgen Hammeken filmimi "Inuk"-mi tallimanngornermi Nuummi takuteqqaarneqartumi inuttassatut akuersitinneqarsimavoq. Assigiinngitsunilli pisoqarmat Hammeken akuersivoq filmip Hollywood aqqusaaqqaarlugu Nuummi takuteqqaarneqartussanngornerani.

- Oqartoqarsinnaavoq pinngitsaalipalaarlunga angertinniarneqareerlunga aatsaat akuersillunga. Arlaleriarlunga  aperineqarpunga, tamatigulli naaggaartarlunga. Isumaqavissimagaluarpunga filmimi piniartutut inuttassatut tulluartuunanga. Taava ulloq ataasiinnaq misiliiniarlunga akuersivunga pileriarparpulli sapaatit akunneri tallimat ingerlareersimasut filmimilu qimussernerpassuit immiullugit. Ole Jørgen Hammeken oqaluttuarpoq, sisamanngormat filmi Katuamut qaaqqusanut takutinneqareersoq.

Filmi nunani assigiinngitsuni festivalini takutinneqartarsimavoq 20-illu sinnerlugit nersornaatisisimalluni. Ilitsersuisup Mike Magidson-ip filmi Hollywood-imi suliariteqqereerlugu nutaamillu nipilersuutitalersortereerlugu Nunatsinnut pingasunngormat Los Angeles-imiit tikiuppaa, filmilu nuannerluinnartuuvoq.

- Assorsuaq iluatsitsisimavutut siornatigut Universtal Pictures-imi pisortaq Thom Mount filmimi suleqataalermat, taassumalu maluginiarsimavaa filmi suli pitsaanerusunngorsinnaasoq isummani malillugu killoqqinneqarpat nutaamillu nipilersuutitalerneqarpat. Suliareqqereerneranni siullermeerutaasumik ullumi aatsaat takuara assorsuarlu takusara naammagisimaarpara, Ole Jørgen Hammeken oqarpoq filmiliaritittartutut misileerngaataa "Inuk"-mi peqataasoq, tassanilu filmiliaritittartutut ilinniarsimanngitsuinnaat inuttaapput.

Filmip suliarinerata nalaani Mike Magidson aningaasanik amigaateqalersimagaluarpoq, ilimaginngilluinnakkamiilli ikiorneqarput. Tunniussisoq tassaavoq Fyrs Albert Monaco-meersoq, filmi suli piariinngikkaluartoq nuannarinermut aningaasaliisoq taamalu "Inuk"p naammassineqarsinnaanera qulakkeertillugu.

- Assut nuannaarutigisannik tikeraartoraara ullunilu pingasuni qimusseqatigiippugut. Fyrsti qimussernermikk nuannarisaqartuuvoq Uummannamilu tikeraarnermi kingorna Norgep avannaanukarpoq aamma qimusseriartorluni. Taanna ikiuussimanngikkaluarpat filmi piviusunngorsimassanngikkaluarpoq, taamaammat filmimi peqataasut tamatta qujamasuuteqarfigeqaarput, Ole Jørgen Hammeken oqarpoq, ilanngullugu oqaatigaa atuagassiani tusatsiakkani allaaserineqartarnera ilisarsiffigisinnaanngivillugu.

Filmimi Hammeken piniartuuvoq pinerrarissoq, suliaminulli kajungerunnaarsimavoq puisinniarumajunnaarlunilu. Nukappiaraq Inuk aqqutigalugu imminut tatigileqqippoq navialisarlunilu Uummannap eqqaani pinngortitami kusanartorsuarmi qimussereerluni imminut nassaaraluni.

- Piniartukkormiut akornanni inunngortuunagalu alliartorfigisimanngilalla. Nuummiuuvunga aatsaallu Uummannamut nuuppunga 30-it missaannik ukioqarlunga. Tamatuma kingorna qimusserneq ilinniarsimavara, allalli filmimi piniartutut peqataasut piniartuuneq uissutaraat. Sapinngisannguara tamaat qimusserneq sungiunniarsarivara. Filmeriartut nammineq aalangerumaarpaat taamatut takutitsinissamut piareersimanersunga, Ole Jørgen Hammeken oqaluttuarpoq, issivillu siuleriit arfineq aappaanniit takusat malillugit qimussillaqqissilluarsimavoq.

Filmimi "Inuk"-mi Kalaallit Nunaata unammilligassat siumugai arlallit saqqummerput tassalu nunarsuarmioqataavoq aamma piniartutut inuussutissarsiortut sikumi puisinniartarnerat aamma takutinneqarluni.

- Uggornarpoq kulturi ukiorpassuarni atajuarsimasoq ukiu 2100-ussaanni ajortorsiortitaammat. Ullutsinni inuusuttut qimussernermik soqutiginnilersinniarnerat ajornakusoorpoq. Aappaatigut tupinnanngitsumik snescooterit pilerigineruaat. Tassami snescooteri nerisinneqaranilu paariuartariaqanngilaq. Imaassinnaavoq taamaasilluni kulturitoqaq tammariartulersoq, taamaattoq Uummannami tamaviaarpugut kulturip taassuma attatiinnarnissaanut, taassumami siuaasagut Nunatsinnut tikiusinnaatissimavai, Ole Jørgen Hammeken oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat