Nukappiaqqat ukiukitsut biilinik tillitamik ajutoortut
Nukappiaqqat 14-inik aqqaneq-marlunnillu ukiullit nivattaarsuarnut angisuunut assartuissutaasartunut ataasinngornermi ualikkut aporput.
Tamanna Nuummi aqqusinermi 400-ertalimmi pisoq, Kalaallit Nunaanni Politiit KNR-imut paasissutissiipput.
Politiit Nuummi biili innaallagiatortoq ualimut nalunaaqutaq ataatsip missaani tillinneqarsimasut pillugit nalunaarfigineqarput. Nalunaaqutaq 13.30 biili aqqusinermi 400-ertalimmi takuneqarpoq, politiillu tamatuma kingorna biilimik unitsitsinialerput.
Biililu tillinneqarsimasut tassani aqquserngup illuatungaatigut ingerlasumut kummersuarnik assakaasulimmut aporpoq.
Suliamik isumaginnittoqarfimmi suliarineqartoq
Nukappiaraq 14-inik ukiulik aquttuuvoq, aqqaneq-marlunnillu ukiulik nukappiaraq ilaasarfimmiilluni. Nukappiaqqat tamarmik ajunngillat, Dronning Ingriudip Napparsimmavissuanili nakkutigineqarallarlutik.
Kummersuarnik assakaasulimmi aquttoq apornermi ajoqusinngilaq, pisorli tupaatigeqaa.
Nukappiaqqat ukiukinnerat pissutigalugu suliaq inunnik isumaginnittoqarfimmi suliarineqassaaq.
Biilip tillinneqarneranut atatillugu politiit kaammattuuteqarput:
- Biilit matuersaataat ikittarfianniitiinnarlugit imaluunniit biiliniitsiinnarlugit qimanneqartassanngillat. Taama pisoqarpat biilimik piginnittoq aqqusinermi angalannermut inatsimmik unioqqutitsisutut pineqaatissinneqarsinnaavoq, Kalaallit Nunaanni Politiit pigaartuat, Nuno Larsen oqarpoq.