Nukappiaqqat ujaarineqartut ullut qulingiluassaanni nassaarineqartut
Nukappiaqqat arsartartut aqqaneq-marluk sungiusaasuatalu qaarusummit anisinneqarnissaanut qanoq sivisutigissanersoq suli nalunarpoq.
Taamaammat nukappiaqqat 11-niit 16-inut ukiullit sungiusaasuallu 25-nik ukiulik aqqarnermik sungiusartinneqassapput nerisassanillu qaammatinut sisamanut naammattunik tunineqassallutik.
Thailandimiut sakkutuuisa imarsiortut umiarsuaanni kaptajni taama ilisimatitsisoq Thailandimiut sakkutuuisa pisortatigoortumik nalunaarutaanni allassimavoq.
- Tamanna ilutigalugu qaarusuup imertaarunnissaa sulissutigaarput, nerisassanillu qaammatinut sisamanut naammattunik eqqussiniarluta. Kiisalu tammaaneqartut 13-it tamarmik aqqarnermik ilinniartissavagut, Surawan oqarpoq.
Nukappiaqqat juunip 23-ani tammarmata ujaasinerujussuaq aallartinneqarpoq. Arsartartut uumatillugit nassaarineqarnissaat oqartussat aallaqqaammulli neriuutigaat. Nukappiaqqallu ataasinngornermi unnukkut nassaarineqarput.
Nukappiaqqat arsaannermi tujuuluaqqatik nissumi tungaannut amullugit, pequliallutit issiasut qaarusummi videoliami takuneqarsinnaavoq. Nassaarineqartut qaarusummi qatsissumi imermik ungalusimasumiipput.
Angutit 1000-init amerlanerusut ujaaseqataapput, sakkutuullu umiarsuaanni aqqartartut qaarusummut ujaasiartortinneqarlutik.
