Nukappiaqqat ineriartornermi eqqugaanerpaasimapput
Nukappiaqqat kisitsisini alianartumik assigiinngitsutigut amerlanerpaasarput:
Inuusuttuaqqani imminortuni, ilinniarnermik unitsitsiinnartuni, persortaasimasoqarsimatillugulu nukappiaqqat niviarsiaqqanit amerlaneroqaat.
Perorsaaneq pillugu Inatsisartuni oqallittoqarmat tamanna eqqaaneqarpoq, Demokraatit oqaaseqartartuata Michael Rosingip saqqummiinerani:
Ajornartorsiutaasoq tassaavoq angutit inuiaqatigiinni isigineqarnerat,
Michael Rosing oqarpoq.
Taanna isumaqarpoq, qanga piniartuunerup nalaaniit inuiaqatigiinnut atugarissaarfiusunut ikaarsaariartornermi ajornartorsiutit pilersimasut.
- Angut qanga pilersuisuuvoq. Ilaqutariit qeqqat, inuiaqatigiinnilu kisimiilluni oqartussaq. Inuiaqatigiinni nutaani angut qitiujunnariartorpoq, qangatullu pingaartigiunnaarluni. Taava nukappiaqqat amerlasoorpasuit silarsuarmi qitiusussatut perorsaarneqarsimallutik, silarsuarmut piviusumut akuuleraangamik taamaattoqanngitsorlu paasillugu taqittarput, Michael Rosing oqarpoq.
Apeqquteqaat tunngavigalugu oqallinnerit aalajangiiffiuneq ajorput, taamaammallu apeqqutinut assigiinngitsunut partiit qanoq inissisimanerminnik ersersitsiffittut atortarpaat.
Kisianni ullumi taamaappianngilaq, oqallittoqaasaarnerani ilaasortarpaaluit peqataanngillat. Assersuutigalugu Inuit Ataqatigiit Siumullu saqqummiussaat oqaaseqarfigineqanngillalluunniit. Kisianni Demokraatit Atassutillu saqqummiussaannut oqallittoqarpoq.
Atassutip oqaaseqartartuata Knud Kristiansenip ersqqissarpaa, angajoqqaat meeqqaminnut qanoq perorsaanissaat politikerit akuliuffissarinngikkaat. Tamannalu akerlerineqarpasinngilaaq.
Kisianni Michael Rosingip nukappiaqqanik perorsaasarnerup ajornartorsiutitaqarneranik nassuiaataa Knud Kristiansenip oqaluttarfimmit torralataanerareermagu, Inuit Ataqatigiinneersoq Kaali Olsen oqaaaseqarumavoq:
- Allaanngilaq, inuiaqatigiit ineriartornerat malillugu perorsaaneq piginaaneriunnaarsimagipput, meeqqagullu amerlavallaartut ajornartorsiuteqartut. Uanga isumaqarpunga, perorsaallaqqissorujussuusugut. Meeqqagut periarfissittarpavut, kulturitoqqatsinniit ullumikkut inooriatsitsinnut pulatikkiartorlugit, Kaali Olsen oqarpoq.
Isumaginninnermut naalakkersuisoq Maliina Abelsen oqallinnermut malinnaavoq. Taanna neriussimagaluarpoq, ajornartorsiutinik qaangiiniarnermi maligassiuisunik iluaquteqarnissaq arlaanit oqaluuserineqassasoq:
- Assersuutigalugu suliniut Matumi sulisut inuusuttunut sullitaminnut piuminaatsumik pissusilinnut maligassatut inissisimapput. Sulisut timiminnik nukinissanikkut takutittarpaat, peqqarniisaanngikkaluarluni kamak allaanerusumik anisinneqarsinnaasoq, Maliina Abelsen oqarpoq.
Taanna aamma oqarpoq, tamatta inuiaqatigiinni akisussaaqataanerput ilisimaarinerusariaqaripput.
