Nuka Tha Diva Københavnimi takutitsilluarpoq
Kiuuleq timimut attuumaqqissaartoq qaqortoq siilvinik sapangalersorsimasoq atisimariarlugu qernertunik takisuunik nujaasalerluni, Nuka Bisgaard akuleruteratarpoq, uppatinilu eqqussortillugit pisuttarfikkoormat isiginnaartut nuannallutik avaallattut imaaginnavipput. Københavnimi Rådhusplads-imi angutit arnatut atisalersorsimasut takutitsimmata inuit tuusintilikkaat isiginnaariarput.
Nuka The Diva inuit taama amerlatigisut saavannut aatsaat sassarpoq.
- Tupinnarluinnarpoq. Ilami ingasapporluunniit. Taamaammat unnugu qanoq pisoqarnissaa pissanganaallak. Ilami uattut atikkersortartut aatsaat taama amerlatigisut takutitseqatigisussanngorpakka, Nuka Bisgaard oqarpoq.
Nukalumi takutitsilluarsimaqimmat isiginnaariat marluk, tassa Salar aamma Milo nersualaarinnippalaarlutik ima oqarput:
- Assorsuaq torrallaavoq. Uppatersullaqqeqaarmi Beyoncemillu assiliillaqqeqaluni, taamaammat takunnittut tamarmik ugguarutissaqanngillat. Salar oqarpoq, Milo-lu tunuarsimaarani ima oqarluni:
- Kameqarnera torrallaaneruvoq. Tassami tassuunatigut kalaaliunera ilisarnaatigaa, taannalu kisiartapajaajulluni kimmikkaaqanngimmat qittareqaaq, asulu torrallaarsuaqaluni, Milo oqarpoq.
Arnatut atikkersorluni taamatut takutitsisarneq Nuka aqqanilinnilli ukioqarluni misileqqaarpaa, 2010-milu Nuuk Gay Pride aallarnersarneqalermat akuuffigivaa ullumikkullu siulittaasuuffigalugu, taamaammat taamatut aaqqissuussinerit pingaaruteqarsinnaaneri ima nittarsaappai:
- Inuit tamatta assigiinnginnerput tamavitta ataqqisariaqarparput. Naligiissitaanermi kikkunnut tamanut atuuttariaqarpoq assigiinngiiaartoqartariaqarlunilu. Taamaammat Nuuk Pride aallarnerparput, asulu tamatuma kingunerisaanik suiaassuseqatiminnik ilaqartartuinnaat kisimik akuujunnaarlutik suiaassuseqatiginngisaminnik ilaqartartut ilaasalerput, tassalu suiaassuseqatiminnik ilaqartartut paasineqarnerulernerinik nassataqarsimalluni. Nuka Bisgaard oqarpoq.
