VIDEO Nuka the Diva Danmarkimi takuteqqaarneqartussanngortoq
Filmiliortitseqatigiiffik Reel Film ilitsersuisartoq Lene Stæhr suleqatigalugu piviusulersaarummik nalunaaquttap-akunneranik sivisussuseqartumik suliarinnittuuvoq. 25-nik ukiullip Nuka Bisgaardip suleqatini Aqqalu Engell peqatigalugu arnatut atorluni isiginnaartitsisummik Eskimo Divamik takutitsisarluni Nunatsinni angalanera piviusulersaarummi malittarineqarpoq.
AAMMA ATUARUK Filmi piviusulersaarut Nuka Eskimo Diva takutinneqalerpoq
Nuka Bisgaardip drag queenini, tassalu arnatut atorluni isiginnaartitsisartuni, siullersaalluni qaasuitsup killingata avannaani angalanissamik takorluukkaminik piviusunngortitsilluni angalanera malittarineqarpoq. Aamma ilimaginngisamik sakkortuumillu nalaataqarpoq, tassami napparsimalernermi kingorna Danmarkiliartariaqalerpoq angalanissallu piviusunngornissaa ilimanarunnaaraluarluni.
Filmi piviusulersaarut Danmarkimi filmertarfissuarni pingasuni septembarip qulingani siullerpaamik takutinneqassaaq. Københavnimi Empire Biomi, Aarhusimi Øst for Paradisimi Koldingilu Nicolai Biomi.
Nuka The Diva aamma DR-TV-kkut ukiormanna kingusinnerusukkut aallakaatinneqassasoq filmiliortitseqatigiiffik ilisimatitsivoq.