Nuissat oqaluttuassarpassuaqarput

"Nuissat isikkuisa tamatta ilisimatuunngortissinnaavaatigut"! Nuummi Ilimmarfimmi ippassaq unnukkut oqalugiartoqarmat qulequtaq taama nipaqarpoq.
Allattoq Carla Davidsen
marsip 22-at 2012 06:03

- Nuissat, nuissallu assigiinngitsut, silap qanoq innissaanik takussutissaqartarnerat, pinngortitamik ilisimatusarnermut aallarniutaasinnaavoq, inunnit nalinginnaasunit - meeqqaniit utoqqarnut - sumiikkaluartunilluunniit - ilikkarneqartartoq. Silasiornermut professori, amerikamiu, Todd D. Ellis Radioaviisimut oqarpoq.

Taanna isumaqarpoq inuusuttut nuissanik qimerluuisarnermikkut ilisimatusarnissartik soqutigilertaraat.

- Ilisimasaqalernermik malussartarneq pingaartuuvoq, isigisallu ilikkaataasinnaapput, taamaammat Kalaallit Nunaat ilisimatuuaqqanik imminnut ilinniartissimasunik ulikkaarpoq.

Todd D. Ellisip taama oqarnermigut ilaatigut eqqarsaatigaa, Kalaallit Nunaanni utoqqaat pinngortitamik ukiorpassuarni qimerluuisarnerminni silap qanoq innissaanik paasisimannittut amerlasoorujussuusut isumaqarami.

- Nuissat qaqqani qanoq nikittarnerat, maani Nuummi akunnittarfimmi ininniit igalaakkut isiginnaaraangakku, nuannaarneq annertoorujussuaq pigilertarpara, professori, ippassaq unnukkut oqalugiareerluni, oqarpoq.

Ilinniartitsisunngorniat Nuummilu GU-mi atuartut Todd D. Ellisip ulluni kingullerni Nuummiinnermini nuissanik qimerluueqatiginiarpai, neriulluni taakku ilisimatusaqqinnissaminnik soqutiginnilissasut.