Nuimasut soraarsitaapput
Nunatsinni takornariaqarnermi inuussutissarsiornermilu siunnersuisooqatigiit siulittaasuat, Stig Rømer Winther, Danmarkimilu suliffissuaqarnermut ministeriusimasoq, Nils Wilhjelm, immikkut ittumik attaveqaqatigiinnit soraarsitaapput.
Attaveqaqatigiit amerikamiut aluminiuliorfiat, Alcoa, nunatsini suliffissuarmik sanatitsiniarluni eqqarsaateqarunartoq, suleqatigisarpaat.
Attaveqaqatigiit qaammatit arlallit matuma siorna pilersinneqarmat Stig Rømer Winther siulittaasunngortinneqarsimagaluartoq, aviisi Sermitsiaq allappoq.
Nils Wilhjelm imaluunniit Alcoa Sermitsiamit oqaaseqartinneqarsinnaasimanngillat.
Stig Rømer Wintherilli attaveqaqatigiinni suleqataajunnaarsimalluni radioaviisimut uppernarsaavoq.
- Itinerusumik nassuiaanneqanngilanga, oqaaseqaqqikkusunngilangalu, Stig Rømer Winther, oqarpoq.
Naalakkersuisut suliniutip qaninnerusumik malinnaavigineqarnissaa kissaatigimmassuk taakku taarserneqarput. Attaveqaqatigiinni nutaamik ilaasortanngorput naalakkersuisut allattoqarfianni pisortaq Peter Schultz aamma Nukissiorfiit pisortaat Svend Hardenberg.
