Nuannaarnerup Tunissutaa sungiusaleruttorpaat

Isiginnaartitsisartut ”Silamiut” Katuap ukiunik qulinngortorsiorneranut atatillugu isiginnaagasiorlutik ulluni makkunani sungiusaruttulerput, inuiattut ullorsiornermi juni-p ulluisa 21-anni takutinneqaqqaartussamik.

Isiginnaartitsissusiaq kalaallit oqaluttuaatitoqaannit isumassarsiaalluni sanaajuvoq ateqartoq, ”Nuannaarnerup tunissutaa”, ullutsinnut naleqqut-tunngorsarlugu ilaqutariinnguit ulapaartut, kiserliortullu, qitiutillugit Silamiukkunnit suliarineqarsimasoq.

Inuuneq assigiiaaginnagajattoq suleruloorfiusartorlu nersutinik/anersaanillu silarsuarmit angakkuakkamit isiginnaagassiami sunnerneqarluni, inoorusunnermit nuannaarnermillu inunnit allanik najorteqarnermi ikiorneqartutut ililluni ingerlaqqippoq.

Kalaallit peqataasut tassaapput Rassi Thygesen (Kaalisaaq), Ulf Fleischer, kiisalu isiginnaartitsisar-tutut siunissaqarluartoq, Mike Fencker Thomsen, isiginnaartitsisartut allat marluk, Norgemiit Sverigemiillu peqataassapput. Aammattaaq ”Erinarsoqatigiit Avannaamioqatigiit, Nordiske Koncert Kor, inuit arfineq pingasut peqataassapput, Pisussaq Silamiut isiginnaagassiaanni ulloq manna tikillugu anginersaassaaq.

Arnaq isiginnaartitsisartoq, Makka Kleist, isiginnaagassiami ilitsersuisuussaaq ”Nuannaarnerup tunissutaa”-ni taaguuteqartussami ”UKALIATSIAQ”.

Nuummi juunimi takuteqqaarneqareeruni isiginnaagassiaq sinerissami illoqarfinni septembarimi takutinneqartussaavoq.