Nualluut toqussutigineqarsinnaasoq pillugu Mexico-mi upalungaarsimasoqalerpoq
Tamanna pivoq naalagaaffiit peqatigiit peqqissutsimut suliniaqatigiiffiata WHO-p nappaatip nunarsuarmut tamarmut tunillaasuussinnaaneranik nalunaaruteqarnerata kingorna. Nappaat tunillaassuuttoq qanittumi aatsaat paasineqartoq puulukinit timmissanit inunnillu nappaatigineqarpoq, maannamullu Mexico-mi nappaatigineqarluni. Nunarsuup sinneranut tunillaassuussinnaanera maannakkut qulakkeerlugu oqaatigneqarsinnaanngilaq. Naalagaaffiit Peqatigiit Peqqissutsimut suliniaqatigiiffiata WHO-p nappaatip ulorianartuuneranik nalunaaruteqarnerata kingorna nunarsuarmi naalakkersuisut qanoq iliuusissanik aalajangersaapput. Nappaat Mexicomi ulluinnarni inuunermut malunniuteqarpoq. inuit 20-it 30-illu akornannik amerlatigisut katersuuteqqusaanngillat. Pisortat ingerlataanni inuit amerlasuut katersuuttarfigisartagaanni soorlu katersugaasivinni assaattarffinni isiginnaartitsisarfinnilu katersuuttarnerit ulluni tulliuttuni qulini pisussaagaluit taamaatineqarput. Sakkutuut peqqinnisaqarfinnilu sulisut mittarfinni bussillu unittarfiini inunnik nakkutillipput nualluummik nappaateqarsinnaasunik alapernaallutik.
Mexicop naalagaaffiinni 16-ini nappaat nualluut napppatigineqarpoq
Nualluut USA-mi aamma nappaatigineqartoq paasineqarpoq, USA-mili napparsimasut ikinnerupput toqusoqarsimananilu. Nappaammik tunillatsissimasut Mexicop killeqarfiata eqqaani najugaqarput, tunillatsissimasulli Mexico-miissimanngillat puulukinillu attugaqarsimanatik.