Nualluummut H1N1-imut akiuusutissat uninngasuutigilersimavaat
Akiuussutissanut aningaasartuutaasimasut katillugit 162 milliuun koruuniusimapput - kingumullumi qivialaaraanni aningaasaliissutit silatusaarnermit aallaaveqarsimasuganngillat, assuarliinerillumi aallartereersimapput-aasiit.
Nualluut H1N1-imut akiuussutissat 3,1 milliuunit danskit oqartussaasuinit pisiarineqarsimapput, ullorlu manna tikillugu 380.000-iinnaat atorneqarsimallutik. Taamaammat oqartussaasut - tassa danskit folketingimi ilaasortai - taamatut iliorsimaneq sianiilliorsimanertut taasalerpaat.
Partiillu Enhedslistip peqqinnissamut tunngassutilinnik oqaaseqartartuata Per Clausenip kukkusimanertik nassuerutigaa:
Massakkorpiaq kukkorujussuarsimanerput takusinnaavara, tassami pissaaneq annertoorujussuaq nakorsaasiortunut tunniussimavarput, taakkualumi neqeroorutaat paatsuugassaasimanngilaq, tassaasoq tamaasa pisiarinianngikkussigit sunnguamilluunniit pisinavianngilasi.
Taamaamat danskit oqartussaasuisa 162 million koruunit atorlugit akiuussutissarpassuit ataatsikkorsuaq pisiarisimavaat, naalagaafiummi nakorsaasiortartunut 2007-imi isumaqatigiissutaat malillugu akiuussutissat ataatsikkut pisiarisussanngorlugit inissisimalersimallutik. Akiuussutissallu 2,5 milliuuniusut qanoq pineqassanersut nalornissutinngorsimavoq, peqqinnissaqarfiulli akiuussutissarpassuit qanoq pineqarnissai suli isummersuutigisimanngilaat, imaassinnaammammi nualluut H1N1 tuniluutileqqittoq unnerlugu.
Taamaammat Per Clausenip akiuussutissat sinneruttut nunanut piitsunut nunarsuarmioqatigiit peqqinnissamik nakkutilliisooqatigiiffianut WHO aqqutigalugu nassiussuunneqarnissaat siunnersuutigaa.
DR-ip ilanngutassiaa Knud Reimerimit kalaallisuunngortinneqarpoq. Danmarkimi inuit 23-it, Europami 1.652-it, nunasuullu sinnerani inuit 10.388-it nualluut H1N1 toqqutigisimavaat. Nunatsinnili nualluut inuit inuunerannik akeqarsimanngilaq.
