Novemberip 15-ianni qinersisoqassaaq!
Inatsisartut ataatsimiinnerat akunneq ilivitsoq sinnilaarlugu maanna ingerlareerpoq. Ataatsimiinneq Inatsisartut siulittaasuata Jonathan Motzfeldtip nalunaaqutaq aqqaninngortorlu ammarpaa.
Ullormullu oqaluuserisassatut saqqummiunneqartut, tassaapput; Inatsisartuni immikkut qinersinissamik akuersissuteqarnissamut tunngasoq, kiisalu aappaagu aningaasaliinissamut, aningaasanut inatsisaagallartussatut siunnersuummut tunngasoq, saqqummiunneqarput.
Taakku Inatsisartuni ilaasortani tamarmiusuni oqaluuserisassatut akuersaarneqarput.
Inatsisartunut qinersinissamik siunnersuut partiinit tamanit akuersaarneqarpoq.
Taamaattorli Naalakkersuisut siulittaasuata ullup qinersivissap novemberip 22-ianiit novemberip 15-ianut siuartinneqarnissaanik kissaateqarnera partiinit tamarmiusunit akuersaarneqanngilaq.
Naalakkersuisut siulittaasuata taama kissaateqarnerminut tunngavigaa, nunap aqutsisoqarani piffissami sivisuallaami ingerlannginnissaa. Siuartitsineq Siumumit Inuit Ataqatigiinnillu akuersaarneqarpoq, Atassut Demokraatit Kattusseqatigiillu qinersinissamik siuartitsinermut akuersaanngillat.
Aallaqqaammut ulloq qinersivissatut suaarutigineqartoq tassa novemberip 22-iat illuatungiliuttunit aalajangiusimaneqarluni. Massakkorpiarlu ullormut oqaluuserisassani aningaasanut inatsisaagallartussaq oqallisigineqaleruttorpoq, Inatsisartullu siulittaasuata ataatsimiinneq ammarmat erseqqissaatigaa ataatsimiinnerup sivitsorpallaarani ullormi ataatsimi ingerlanneqarnissaa, maleruagassat naapertorlugit ingerlasoqarnissaa pingaaruteqarmat.
