North Greenland Seafood aalisariutitaarpoq
Piginneqatigiiffiup North Greenland Seafoodip radioaviisimut oqaatigaa umiarsuaq F/V Kuluk pisiarisimallugu. Taamaalillutik saarullittassatik 1000 tonsit aalisarsinnaanngussavaat. Piginneqatigiiffik aalisariummik attartornissamut aggustip 22-ata tungaanut periarfissinneqarpoq, maannali umiarsuarmik pisillutik.
Allattoq Louise M. Kleemann
aggustip 27-at 2008 10:13
- Umiarsuaq Ilulissani nalunaarsorneqassaaq, 37 meterinillu takissuseqarluni. Pisinermut uppernarsaatit Imarsiornermut Qullersaqarfimmi sulioarineqaleruttorput, taakkulu maanna utaqqiinnarpavut, North Greenland Seafoodip siulittaasua Anthon Lindenhann oqarpoq, nangipporlu:
- Taamaalereerpat umiarsuaq sapaatip-akunnerini marlunni amutsivimmi misissorneqassaaq, kingornalu aalisarsinnaalernissarput neriuutigaarput, North Greenland Seafoodip siulittaasua oqarpoq.
Aalisarnermut, piniarnermut nunalerinermullu naalakkersuisoqarfiup pisortaa Amalie Jessen piginneqatigiiffimmut tunngatillugu oqaaseqarsinnaannginnerarpoq, pisinermut uppernarsaatit tigoqqaarusukkamikkit.
