Norskinik ujaasinermi aqutsisoq: Ujaasisut sulilluarsimapput

- Pisut ilaquttanut qanigisanullu artornarsimaqaat, maaninnertilli qujaruppaat nikalluisaarlutillu. Pisut eqqarsaatigalugit ujaasiartortut ajunngillat, Svein Arne Corneliussen KNR-imut ullumi taama oqarpoq.

Taassuma Kalaallit Nunaanni politiit Kangerlussuup eqqaani norgemiunik tammaaneqartunik ujaasinermut atatillugu sulinerat assorsuaq ataqqivaa.

- Kalaallit Nunaanni politiit annertuumik pitsaasumillu suliaqarsimapput taakkualu suliaat assorsuaq ataqqivara.

Kalaallit Nunaanni politiit norgemiunik tammaaneqartunik ujaasineq unitsippaat. Corneliussen norskinut katillutik 14-iusunut maannakkorpiaq norgemiunik tammaaneqartunik marlunnik Arnangarnup Qooruani ulluni qulingiluani nallukkiareerlutik, tallimanngormallu Kangerlussuarmut utereersimasussaagaluartunik, ujaasinermik nangitsisunut siulersuisuuvoq.

Vicepolitimesterip Morten Nielsen ujaasinerup suna pillugu unitsinneqarsimanera matumani nassuiarpaa.

- Ujaasinerup unitsinneqarnissaa politiit pingasunngormat aalajangiuppaat. Ujaasineq unitsipparput ujaarineqartut marluk uumatillugit nassaarineqarnissaat ilimaginnginnatsigu.

- Ujaasisunut ikiuussinnaanngilagut. Ujaasinerput unitsipparput taamaattumillu toqqavissaqartinngilarput sooq norgemiut marluk ujarneqarneranni peqataassalluta, taamaattumik ujaasisunut allanut ikiuussinnaanatalu ujarleqataasinnaanngilagut.

Qanigisaasut marlunngormat Kangerlussuarmut tikipput namminnerlu ujaasinermi peqataalerlutik, Svein Arne Corneliussenilu isumaqarpoq takornariat, Kalaallit Nunaanni pinngortitami namminneq akisussaaffigalugu angalasut, GPS-imik qaammataasamullu atassutilinnik atortoqartarnissaat isumassarsiatsialaasoq.

GPS-imik qaammataasakkullu atortut atorneqartuuppata pitsaassagaluarpoq, atortut taakkua ajornatuulernermi atorneqarsinnaammata. Attaveqaqatigiinneq tamaat eqqarsaatigalugu ajornartoornermi telefonip qaammataasamut atasup nassarnissaa pitsaassagaluarpoq.