Norgemioq milliardæreq iperagaavoq

Norgemioq milliardæreq 70-nik ukiulik Tom Hagen Oslomi parnaarussivimmit iperagaavoq, nuliaminik toqutsisimasutut toqutseqataasimasutullu pasineqarluni tigummigallagaareerluni.

Norgemi eqqartuussiviit qullersaataa tallimanngornermi ualikkut aalajangerpaa Tom Hagen iperagaassasoq.

Tom Hagen parnaarussivimmit aninissaminik akuerisaanermi kingorna tusagassiortunik oqaloqateqarusussimanngilaq.

Politiit oqarnerat naapertorlugu Tom Hagen nuliaminik toqutsisimasutut toqutseqataasimasutullu suli pasineqarpoq. Taassuma nulia Anne-Elisabeth Hansen ukioq 2018-mi oktoberimili periarfeerunneqarpoq.

Milliardærip iperaaganissaanik eqqartuussiviit qullersaata aalajangernera landsrettsip sisamanngornermi aalajangernera atuutsinneqarpoq.

Tom Hagenip tigumigallarneqarnissaanut uppernarsaatit landsrettemit naammassorineqanngillat.

Tom Hagenip iperagaanera politiinit tusaatissatut tiguneqartoq, unnerluussisussaatitaasoq Haris Hrenovica oqarpoq.

- Pinerluttoqarsimaneranik paasiniaaneq ingerlaannarpoq, Tom Hagenimullu pasilliutigineqartut suli atuupput, unnerluussissussaatitaasoq tusagassiuutinut nalunaarummi taama allappoq.

Milliardærip nuliata tammarneranut atatillugu angut 30-it missaanik ukiulik Norgemi politiinit tigusarineqarpoq,

Angut tigusarineqartoq Tom Hagenimut attumassuteqarpoq.

Politiit aamma nalunaarutigaat angut tigusarineqartoq qarasaasiatigut nalilinnik atuinissamik ilisimasaqarpoq.