Tipimik eqqumiitsoqarmat Islandimukartariaqartoq
Air Greenlandip timmisartorsua Norsaq Kangerlussuarmit Københavnimukartilluni Islandimi unnuaq nunnittariaqarsimavoq.
Allattoq Merete Lindstrøm
juulip 03-at 2018 09:33
Nutserisoq Ane-Marie Petersen
Nutartigaq: 09.53
Timmisartup iggavianit eqqumiitsumik tipiliortoqarmat timmisartorsuaq Islandimi isumannaallisaaneq pillugu nunnittariaqarsimavoq tassanilu misissorneqassalluni.
Ilaasut 146-iusut Islandimi akunnittarfimmi inissinneqarlutik unnuisariaqarsimapput. Taakkulu Keflavikkimiit nunatta nalunaaqutaa malillugu ualeru sisamanut Københavimut ingerlaqqissasut, Air Greenland tusagassiuutinut nalunaarummi allappoq.
Timmisartup kinguaattornerata ullumi Atlantikoq ikaarlugu timmisartuussinissamut taamaatitsinermik kinguneqarpoq.
Ilaasut tamarmik allamut inniminniissunneqarput aqagulu unnukkut immikkut timmisartuussisoqarnissaa pilersaarutigineqarluni.
