Norsaq kinguaattoorpoq

Air Greenlandip atlantikukkut timmisartua, Norsaq, ullaaq Københavnimit Kangerlussuarmut uterlugulu ingerlaartussaagaluarluni aallanngitsoorpoq, tassa teknikkikkut akornuteqarnera tamatumunnga pissutaavoq.

Atlantikoq qulaallugu angalasussat tamarmik, aqagu ornitaminnut apuussinnaaniassammata, taarsiullugu Air Greenlandimit Boeing 737 Sterlingimeersoq aqagu marlunngornermi attartorneqassaaq.

Taamaalilluni aqagu Kangerlussuarmut timmisartorsuit marluk tikissapput, ilaasut nunatta sinneranut ingerlaqqittussat sapinngisaq naapertorlugu ingerlateqqinneqarnissaat Air Greenlandimiit neriorsuutigineqarpoq.

Ullumikkut timmisartuussinissap taamaatiinnarneqarnerata kinguneranik, aqagu timmisartuussinissat aammattaaq allanngorput, kisianni Air Greenlandimit nalunaarutigineqarpoq ilaasussat tamarmik ilisimatinneqareersimasut.

Nalornigaanni Air Greenlandip nittartagaa alakkarneqarsinnaavoq imaluunniit najukkami angalatitsiviup allaffia sianerfigineqarsinnaavoq.