Norsaq ingerlaaqqilerpoq
Air Greenlandip timmisartorsua ’Norsaq’ teknikkikkut misissorneqareerluni ingerlaaqqilerpoq.
Ataasinngormat ullaakkut Air Greenlandip timmisartorsua ’Norsaq’ aallaraluarnerminit 15 minutsit qaangiutiinnartut Københavnimut uterpoq, timmisartorsuup perusuersartarfiisa ilaanni pujortoqarneranik kalerrisaarisoqartoqarnerata aamma pujorsunnitsumik naamasoqartoqarnerata kingornagut. Misissueqqissaartoqarneratigut paasineqarpoq pujuliornerup pissutigigaa timmisartup silaannarmik nillusaasuini atortup ventiilip, nalinginnaasumik misissuinermi tarnutissaanik taninneqarsimanera.
’Tarnutillu taassuma sinneruttup pujuliorneq pilersissimavaa pujorsunnitsumillu tippatsitsilluni’, Air Greenland ullumi taama nassuiaateqarpoq.
’Timmisartorsuup ventiiliata taninneqarnera, nunani tamalaani timmisartunik misissuinermi maleruaqqusat naapertorlugit pisimasoq’, ilaatigut nassuiarneqarpoq.
Taamaattumik Air Greenlandip timmisartorsua ’Norsaq’ ullumikkut marlunngornermi pilersaarutit naapertorlugit Københavnimit Kangerlussuarmut utimullu ilaasunik angallassivoq.