"Norsaq" aqagu marloriartinneqassaaq
Kangerlussuarmi anori sakkortooq allanngorartorlu ullumi atuummat Air Greenlandip Airbus-ia Norsaq missinnaasimanngilaq, taamaattumik sinerissamut ingerlaqqittussat GL781-ip GL782-illu ilaasui aamma kinguaattoorput.
Airbus-i maannakkorpiaq Keflavik-imut ingerlaarpoq orsersoreerunilu Københavnimut ingerlaqqissalluni, taama Air Greenland ualiartoq nalunaaruteqarpoq.
Silasiortut unnuarornissaata tungaanut anorlerallassasoq ilimasaarutigereerpaat.
Air Greenlandip Airbus-i aqagu marloriartissammagu, ullumi ilaasussaagaluit aqagu tallimanngornermi maajip ulluisa 30-annut aallartussanngorlugit aamma nuunneqarsimapput,. Timmisartuussineq unnukkut pisussaassaaq, Danmarkiliartut nal. 23:40 aallassallutik Københavnimut nal. 08.00 apuutissallutik.
Københavnimiit Kangerlussualiartussat nal. 21:45 aallassapput Kangerlussuarmut nal. 22:25 apuutissallutik.
Nunatta iluani immikkut aamma timmisartuussisoqassaaq, Nuummukartut tallimanngornermi unnuap qeqqanut nal. 24:00 missaani apuutissapput, ilaasullu Maniitsumut, Aasiannut, Ilulissanut Sisimiunullu ingerlasussat arfininngornermi apuunnissaat ilimagineqarpoq.
Allakkat nassiussallu ulloq unnuarlu ataaseq kinguaattuussasut, Air Greenlandip ilanngullugu nalunaarutigaa.