Norgip sineriaani uuliarluertoqarpoq
Umiarsuup assartuutip Full Cityp Norgip kujasinnerusortaata sineriaani tallimanngormat umiuneratigut uuliarluertoqarpoq, uuliamillu katersineq maanna aallartilluni.
Allattoq Mads Lynge
Uulia 1000 tonsit sinnerlugit annertutigisoq umiarsuarmit aniavoq. Umiarsuaq Panamami nalunaarsugaasoq 23-nik inuttaqarpoq, Langesundimilu uuliarluernermi avatangiisinik mingutsitserujussuartoqarsinnaanera aarleqqutigineqarpoq.
Sverigep imartaanik aamma mingutsitsisoqarnissaa aarleqqutigineqarpoq.
- Uulia tamani tamaani takussaavoq, timmiarpassuillu uuliamik qalligaapput, Sverigep sineriaanik nakkutilliisoq Carl-Gustav Konow Sverigemi nutaarsiassaqartitsivimmut TT-mut taama oqarpoq.
Umiarsuit qulit Norgimeersut uuliamik katersuisinneqarput, svenskillu umiarsuarmik aamma Norgiliartitsillutik.