Norgimi ministeri: Issittumi inatsisit malittariaqarpagut
Ruslandip nunallu killiit akornanni aaqqiagiinngissutit Issittoq pillugu suleqatigiinnermut sunniuttariaqanngillat, Brende isumaqarpoq. Nutaarsiassaqartitsivik Ritzau taama allaaserisaqarpoq.
Nunanut allanut tunngasunut ministeria Alaskami Anchorage-imut ippassaq apuuppoq, Issittoq pillugu ataatsimeersuarnermut "Glacier"-imik taaguuserneqarsimasumut peqataanissani pillugu Anchorageliarluni. Issittoq pillugu suleqatigiissutit, silallu pissusiata allanngoriartornerata akiorniarneqarnissaa pillugu ataatsimeersuartoqarpoq:
- Issittumut ussannersuaqarnissaa pinngitsoortinnikuuarput, nunallu assigiinngitsut inatsisaannik unioqqutitsinani sulinissaq qulakkeernikuuarput, immallu atorneqarneri pillugit inatsisit maannamut annerusumik aamma unioqqutinneqarsimanatik. Nunat tamalaat inatsisinik unioqqutitsinnginnissartik pingaartippaat, Børge Brende oqarpoq.
Nunat assigiinngitsut inatsisit ataqqinagit imminuinnaq pingaartitsilerunik nunat tamalaat Issittoq pillugu suleqatigiinnerat ajalusuussasoq, taassuma erseqqissaatigaa.
Ruslandip Ukrainemi Krimip qeqertaasaanik ukiup aappaata qeqqa matuma siornatigut tiguaammalli Ruslandip nunallu killiit akornanni aaqqiagiinngissutit aallartipput, suleqatigiinnerup ajalusoorsimaneranik kinguneqarnerarlugu.