Norgep Rusland qarasaasiakkut peqquserluttuliorsimaneraraa
Rusland Norgemi inatsisartunut ilaasortat arlaqartut e-mailiinut aggustip qaammataani peqquserluttuliorsimasutut Norgemi inatsisartunit Stortingeimit pisuutinneqarpoq.
- Norgemi naalakkersuisut paasissutissaataat tunngavigalugit, Rusland peqquserluttuliorluni inatsisartunut ilaasortat e-mailiinut isersimasutut naliliivugut, Norgep nunanut allanut ministeria Ine Eriksen Søreide marlunngornermi oqarpoq.
Qarasaasiakkut peqquserluttuliortoqarsimanera Norgemi inatsisartunit Stortingetimit aggustip ulluisa 24-anni nalunaarutigineqarpoq.
- Pisoq ilungersunartorujussuuvoq, suliffeqarfipput tamat oqartussaanerannik pingaarnertitsisoq eqqugaavoq, nunanut allanut ministeri oqarpoq.
AAMMA ATUARUK Qarasaasianut unioqqutitsillutik saassussisut Microsoftimit paasisaasut
Inatsisartuni Stortingetimi siulittaasup, Tone, W. Trøenip qarasaasiakkut saassussisoqarsimanera akuerineqarsinnaanngitsutut ilungersunartorujussuartullu aamma taavaa.
Qarasaasiakkut saassussineq illersoqatigiinni isumakulunnermik pilersitsisoq, Natomi qullersaq Norgemi ministeriunerusimasoq Jens Stoltenberg oqarpoq.
- Norgemi Stortingemut saassussineq ilungersunartorujussuuvoq. Norgemi oqartussat Rusland saassussisuusimanerarlugu naliliinera tutsuigaarput, taanna Norgemi TV 2-mut oqarpoq.
Ruslandip Oslomi aallartitaqarfiata Rusland saassussisimasuunnginnerarpaa, saassussisimasuunerarneqarneralu. norskit russillu attaveqatigiinerannut aserorterinertut taavaa.
