Norgep avannaa Svalbard-ilu kiannerulissapput

Kiatsikkiartorneranut atatillugu iliuusissanik pilersaarusiortoqarnissaa silap pissusaa pillugu nalunaarusiamik suliaqartup ilisimatuup kajumissaarutigaa.

Nunarsuarmi tamarmi agguaqatigiissillu gradinik marlunnik kiannerulernissaa ilisimatuunit manna tikillugu naatsorsutigineqaraluarpoq. Nalunaarusiamili qanittumi suliarineqartumi, nunat tamat ilisimatuuinit suliarineqartumi, paasineqarpoq, sumiiffinni ataasiakkaani kiassutsit qiianassutsillu allanngortarnerat ilimagisamit annertunerusartoq, nutaarsiassaqartitsivik ritzau taamatut allaaserisaqarpoq.

Ukiut 100-t ingerlaneranni Svalbardimi gradit arfineq pingasut tikillugit kiannerulersinnaavoq Norgip avannaata nunavittaani marlunnik aappaa affarmillu kiannerulersinaalluni. Silap pissusaata allanngoriataartarnissaanut, isugutannerulernissaanut kiannerulernissaanullu tunngatillugu maannangaaq piareersartoqarnissaa, Ellen Øseth Norgimi Tromsømi Polarinstitut-imeersoq oqarpoq.

Nunaatillit ulllumikkut atukkaminnit allaannerusunik atugaqalissapput immaqa annertunerusunik nunaateqalerlutik, Ellen Øseth oqarpoq.

Aalisakkat assiginngitsut nalinginnaasumik kujasinnerusumi aalisarneqartartut avannaatungaani aalisarneqartalernissaat naatsorsuutigineqarsinnaavoq.

Aput sermerlu sukkanerusumik aattalissapput, tamanna imermut imerneqartartumut, nukissiuuteqarnermut kuuffinnut taakkualu aqqutaannut kinguneqartussaapput, Ellen Øseth oqarpoq.