Norgep AstraZenecamit akiuussutissaq marsip ulluisa aqqarnanni atorunnaarallarpaa. Akiuussutissaq taanna maanna atorunnaavinneqarpoq.Assi: Scanpix

Norgep AstraZenecamit akiuussutissaq atorunnaaraa

Norgep AstraZenecamit akiuussutissaq pillugu immikkut ilisimasallit innersuussinerisa kinguneratigut atorunnaarpaa. Johnson & Johnsonimit akiuussutissaq nammineq piumassuseq malillugu unitsikkallarneqarpoq.

Norgep AstraZenecamit akiuussutissaq akiuussusersuinissamut pilersaarumminit peerpaa. Tamanna ministeriunerup Erna Solbergip tusagassiortunik pingasunngornermi unnukkut katersortitsinermi uppernarsarpaa.

Aviisit VG-p akiuussutissap atorunnaarneqarnissaa ullormi siusinnerusukkut paasivaa.

Coronamut akiuussutissaq Johnson & Johnsonimeersoq suli atorunnaarallaqqaneqarpoq, tamannali nammineq aalajangernermi iliorneruvoq.

Norgemiut inuit peqqinnissamut ilisimatusarfiata immikkullu ilisimasallit akiuussutissap atorunnaarsinneqarnissaa innersuussutigaat.

Norgep AstraZenecamit akiuussutissamik atuineq marsip ulluisa aqqarnanni unitsikkallarnikuuaa.

Akiuussutissat taakku marluk Danmarkimi atorunnaarsinneqartut

Danmarkip akiuussutissat taakku marluk akiuussusersuinermi pilersaarutiminit atorunnaarsereerpai. Innuttaasulli nammineq toqqaanissaanut aaqqiissuteqarnikkut akiuussutissanik taakkunannga marlunnit kapitittoqarsinnaanissaa politikkikkut amerlanerussuteqartut aalajangerpaat.

Akiuussutissamik kapitinnerup kingunerisaanik taqqatigut milittoornermik qaqutigoortumik kingunerluuteqartoqarnera pissutigalugu akiuussutissat ernumassutigineqalerput.

Norgemi Danmarkimilu akiuussutissat marluk piffissami matumani atorneqarput. Akiuussutissat atorneqartut tassaapput Modernameersoq aamma Pfizer/BioNtechimeersoq. Akiuussutissat taakku marluk pisortat akiuussusersuinissamut pilersaarutaannit peerneqartunit allaanerusumik sananeqarnikuupput.

Inuusunnerusut tullinnguukkiartulersut

Norgemi innuttaasut 138.300-t AstraZenecamit akiuussutissamik siullermeertumik kapitissimapput. Taakku aappassaaneertumik kapitinnissaminnut akiuussutissamik allamik neqeroorfigineqarnissaat aalajangerneqarpoq.

Norgemiut inuusuttut 18-init 24-nut ukiullit pilersaarutaasumit siusinnerusumi akiuussuserneqarnissamut neqeroorfigineqassasut Erna Solbergip pingasunngornermi aamma oqaatigaa.

- Naalakkersuisut inuusunnerusut akornanni tunillaassuuttoqarnerunera pissutigalugu akiuussuserneqarnissamut tulleriiaarinermi inuusuttut siusinnerusumi neqeroorfiginiarpaat. Inuusuttut inersimasut utoqqaanerusunit inoqatinut attaveqarnerupput takkulu tunillaassuunnerup siuaanneranut pissutaanerullutik, Solberg oqarpoq.

Nunatsinni akiuussutissat Pfizer/BioNtechimeersoq aamma Modernameersoq kisimik atorneqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat