Norgemiut tuluillu Sermersuaq itivillugu rekordiliisut

Norgemiullu Vegard Jørstad, Ole Christian Kjenstad aamma Ronny Andre Kjenstad oqitsunik sisoraaserlutik kitaanit tunup sineriaanut ingerlaarfimmi kilometerinik 560-inik isorartussusilimmi - soorunami - sukkanersaapput, rekordiusoq nalunaaquttap-akunnerinik 24-ngajannik sukkanerullutik angugamikku.

- Sinippiarneq-ajorpugut sisoraatinillu ullup ilarujussua ingerlaartarluta. Ullut tamaasa immitsinnut annertuumik piumaffigaagut tamannalu malugisinnaalluarparput. Tunu tikikkiartorlutigu qaqqat nuinerat nuanneqaaq, apuuffissarput qanilliartorlugu malugisinnaaleratsigu, Ronny Andre Kjenstad NRK-mut taama oqarpoq.

Norgemiut pingasut Norgemiut inuiattut ullorsiornerat nunaqarfimmi Isortumi ippassaq sapaammi nalliuttorsiutigaat. Pingasunngormalli Isortumiipput.

Angalanerat pillugu uani atuagassaqarpoq.

Tuluit, imminnut ilisimasassarsiortuunerartut, tassaapput Tom Avery, George Wells, Andrew Gerber aamma Patrick Woodhead. Taakkulu atortunik oqimaannerumaartunik nassataqaramik ullunik marlussunnik kigaannerusimapput. Rekorditoqaq ullunik arfineq-pingasunik qaangersimallugu tv-qarfimmut BBC-mut oqaluttuarput.

- Tungujorneqqaqaagut, panertooqqaqaluta aniinnillutalu, anguniagarpulli angugatsigu naammagalugit atorpagut, Tom Avery BBC-mut oqarpoq.

Taakku anoraanik iluatsitsisimapput, qullartartuliammi, aamma kite-surferutigineqartartut, aqqutaata ilarujussuani atorsimavaat, angalanerulli ulluisa kingullersaanni atortut nassatatik qaqqakkooruttariaqarsimavaat, tamannalu nalunaaquttap-akunnerinik 21-nik sivisussuseqarsimavoq.

- Nuannaaqaagut aatsaallu inuulillarattali taama qasutigaluta, ilisimasassarsiortut ittuat Tom Avery oqaluttuarpoq.

Tuluit qasoqqaqisut allanik misilitassaminnik aallartitsinnginnerminni immaqa norgemiut pingasut qasuersaaqatigaat.