Norgemiut aallartitaat: Issittumi Siunnersuisoqatigiit pissaaneqarnerulik
NunatsiaqOnline naapertorlugu taama isumaqarpoq Canadami Norgep aallartitaa, Else Berit Eikeland.
Issittumi Siunnersuisoqatigiit ataavartumik allattoqarfeqarnissaat ataavartunillu aningaasaliiffigineqartarnissaat taassuma kissaatigaa, ullumikkutut attaveqarpianngitsumik inissisimanerannut taarsiullugu.
Taamaaliornikkut suleqatigiinnerunissaq qaninnerussaaq aaqqiagiinngissuteqarnissarlu ungasinnerussalluni - assersuutigalugu soorlu Issittup Imartaani killilersuinissatut oqallisaaqisunut tunngatillugu.
Tamannali University of Calgarymi sakkutooqarnermut immikkut ilisimasallip Rob Huebertip isumaqatiginngilaa.
Taanna isumaqarpoq Issittumi Siunnersuisoqatigiinni ilaasortat nunani issittuni namminneq soqutigisatik illersorsinnaajumallugit sakkutooqarnikkut piareersarnerat malunnartoq. Sikunews taama allappoq.
