Norgemiup aningaasaatilissuup piiaaviliornissaq qilanaarivaa
Norgemi nittartakkakkut nutaarsiassaqartitsiviup Nord 24-p Norgemi suliffeqarfinnik aallarnisaasoq Malvin Nilsen apersorsimavaa, taassumalu rubininik piiaaviup aallartinnissaa qilanaarinerarpaa. Norgemiu taanna suliffeqarfimmik Leonhard Nilsen & Sønnerimik tunngaviliisuuvoq, Nunatsinni LNS Greenlandimik taaguuteqartoq.
- Aallarnisaasut allat Kalaallit Nunaanniittariaqanngillat, nilleqaarmi atortulersuutillu, soorlu aqquserngit, pitsaasuunatik. Uagulli Norgep avannaamiuusugut tamakku ulluinnarsiutigaagut, Malvin Nilsen 71-inik ukioqartoq taama oqarpoq.
Norgep avannaani illoqarfeeqqamit Risøyhamnimit ilaqutariit suliffeqarfiutaat ukiumut Norgemiut aningaasaataannik milliardinik marlunnik kaaviiaartitaqarfiusoq nunarsuarlu tamakkerlugu ingerlatsisoq aquppaa. LNS Kalaallit Nunaata saniatigut aamma Chilemi, Sikuiuitsoq kujallermi, Honghongimi Islandimilu immikkoortortaqarfeqarpoq.
LNS Greenland piiaavimmut Aappaluttumut, ingerlatsivimmit True North Gemsimit ingerlanneqartumut, aningaasaliisut pingaarnerit ilagaat. Qeqertarsuatsiaat eqqaanni rubininik piiaavimmik aallartisaanermut aningaasaliissutit 20 procentii LNS-imeersuupput. Suliniutip aallartinnissaanut aningaasat 200 millionit koruunit sanaartornissamullu akuersissutit arlariit pisariaqartinneqarput.
Aningaasat pisariaqartinneqartut qulakkeerneqarsimasut True North Gemsip marsip qaammataani nalunaarutigaa, kingullertigullu piiaviup avatangiisinut inuiaqatigiinnullu sunniutigisassai pillugit ingerlatsiviup qinnuteqaataa Kommuneqarfik Sermersuumit akuerineqarpoq.
