Norgemiunik ujaasineq ingerlaqqippoq

Maannamut qulimiguulik ataasiinnaq ujaasigaluarpoq, ullup qeqqalernerani qulimiguulik alla Sisimiuniit aamma ujaasiartortinneqarpoq, taama vicepolitimester Morten Nielsen ilisimatitsivoq.

Ujaasineq ullaaq qulinut aallarteqqinneqarpoq. Ujarneqartullu suli nassaarineqarsimanngillat.

Norskit pingasut Kangerlussuup eqqaani tammaaneqartut asimiinnermik misilittagaqarluartuupput, tammaaneqartut ilaata qatanngutaa Norskit aviisiannut Dagbladet-imut oqarpoq.

Tammaaneqartut ukioq kingulleq tunumeeqatigiipput, Kalaallit Nunaanniinnertillu nuannaringaaramikku ukioq manna Nunatsinnukaqqillutik.

- Pingasuullutik aalajangersimapput ukiut tamaasa Kalaallit Nunaaliaqatigiittarniarlutik, tammaaneqartut ilaata qatanngutaa dagbladet.no-mut oqarpoq.

Ullut qulingiluat qaangiupput tammaaneqartut kingullermik takuneqarmata. Tallimanngormat aalisareerunik utertussaagaluarput, piffissamullu isumaqatigiissutaareersumut takkunnatik.

Isumaqatigiissut malillugu kuuk sinerlugu qoorukkut ingerlasussaanikuupput, qaqqakkut pisunneq navianarsinnaammat.

Politiillu ernummatigaat qaqqakkut ingerlasimasinnaanissaat.

Angutit pingasut tammaaneqartut satellittikkut oqarasuaateqaratillu GPS-imik nassataqanngillat.

Nunap assinganik sumiissusersiummillu nalunngisaminnik nassataqarput.