Norgemiu assiliisartoq Nuummi saqqummersitsilersoq
Assit saqqummersinneqartut Kujataani 1998-imi 1999-imilu angalanermeersuupput. Tronvoll sapaatit-akunnerini qulini Kujataaniippoq, kisimi pinngortitami tupermi piffissap annersaani najugaqarluni. Nuummi Eqqumiitsulianik Katersugaasivik Facebookimi quppernermini taama allaaserisaqarpoq.
Assilissanik katersat Kujataani puilasumi kissartumi Uunartumi aammalu tuttuuteqarfimmi Isortumi assilisaapput saqqummersitsinermullu taaguutigitinneqarlutik.
Assiliisartup ilisarisimaneqaatigilerai
Saqqummersinneqartut tassaapput pinngortitamik inunnillu assilisat, sumiiffiullu aamma pinngortitap kulturikkut saqqummertarnerat Trovollip sammivaa. Assilisat imminnut assortuuttutut misinnarsinnaapput aamma assiliisoq, assilineqartut pinngortitarlu qanittuaqqatut ilisarnartutut misinnarput.
Assit saqqummersinneqartut Tronvollip assiliisartutut eqqumiitsuliortutut ilisarisimaneqalerneranik kinguneqarput assilisaalu ilaatigut New Yorkimi The Metropolitan Museum of Artimi aamma Stockholmimi Moderna Museetimi saqqummersinneqarsimallutik.
Norgep Nunatsinni generalkonsuliata Kristian Lennertip saqqummersitsineq ullumi aggustip 25-ani nal. 16.00 ammassavaa.