Norgemi tunngaviusumik ukiunik 200-nngortorsiorpoq

Meerarpassuit, kunngikkormiut, allallu nuannattunnguupput, illoqarfiillu pingaarnersaanni Oslomi inuppassuit katersuussimallutik.

Folketingip siulittaasuata Mogens Lykketoftip Norgemiut nalliuttorsioqatiginiarlugit maanna Oslomiippoq:

- Inuppassuit Oslomi katersuussimapput. Nuannapput, inuillu 100.000-ilikkaat aqqusinerni takussaapput, Mogens Lykketoft oqarpoq.
Taanna Norgemi Stortingimi oqalugiaqqammerpoq, tuluit nunaanni ministriunerusimasoq Sir Winston Churchill Stortingimi 1948-mi oqalugiarmalli nunanit allaneersoq aatsaat oqalugiarpoq.

Norgep tunngaviusumik inatsisaa 1814-imi maajip ulluisa 17-ianni Oslomit avannamut illoqarfimmi Eidsvollimi illumi atsiorneqarpoq.

Danmarkip Napoleonskrigini ajorsarmat, Norgemut atajunnaarpoq, Norgelu Sverigemut tunniuttariaqarsimallugu. Norgep Danmarkillu ukiuni 434-ni atareerlutik taamaalillutik ataqatigiikkunnaarput.

Kalaallit Nunaata Danmarkimut atalernissaa taamanikkut aalajangerneqarpoq, oqaluttuarisaanermilli ilisimatusarsimasup lektorip Thorkild Kjærgaardip, Ilisimatusarfimmeersup, oqaatigaa Kalaallit Nunaat Norge-Sverigemut atasimasinnaagaluartoq.

Ataqqinartorsuaq Dronning Margrethe prins Henrikilu Oslomi nalliuttorsioriaqataapput, nalliuttorsiornermi isiginnaartitsinermut peqataallutik. Mogens Lykketoft Norgellu statsministeria Erna Solberg kunngikkormiullu Eidsvollimi nalliuttorsioqatigiissapput.