Norgemi qaqqat navianaatillit ataavartumik nakkutigineqartut
Qaqqanik nakkutilliineq Norgemi misilittagaqarfigineqarluarpoq, Norgemilu qaqqanik nakkutilliisut naatsorsuutigaat qaqqap annertunerusumik sisoornissaa kingusinnerpaamik nalunaaquttap akunnerinik 72-inik sioqqutsillutik innuttaasunut mianersoqqussutigisinnaassallugu.
- Minnerpaaffittut piumasaqaatigisarput tassaavoq qaqqap annertunerusumik sisoornissaa nalunaaquttap akunnerinik 72-inik sioqqullugu kalleriuteqarsinnaanissarput, qaqqanulli anginerusunut tunngatillugu qaqqami allanngoriartortoqalernera qaammatini arlalinni, immaqalu ukioq ataaseq angullugu, takusinnaanissaa naatsorsuutigaarput, Norgemi imermut nukissiuuteqarnermullu pisortaqarfimmi NVE-mi ujarassiuutut atorfilik, Lene Kristensen, taama oqarpoq.
Pisortaqarfiup Norgemi qaqqat sisoorfiusinnaasutut aarlerinaateqartupilussuit arfineq-marluk ataavartumik nakkutigisarivai.
Taakku ilagaat Åknes, Ålesundip eqqaaniittoq. Qaqqami quppaq 1983-imi paasineqarpoq, qaqqarlu 1990-ikkut qiteqqunneraniilli ataavartumik nakkutigineqalerpoq.
NVE-p naatsorsuineri naapertorlugit, qaqqaq sisooraluarpat tassaarsuarmik meterinik 70-inik portutigisumik pilersitsissaaq. Taamatullu pisoqassappat inuit 5.000-it qimagussortinneqartussaassapput.
- Åknesip qaqqaata ilaa ukiumut centimeterinik 5-8-nik nikikkiartortarpoq, nikikkiartorneralu nakkutilliinerup aallartinneraniilli allanngorpiarsimanani. Nikikkiartorneralu piffissap ilaani sukkatsissappat pissutsit ilungersunartupilussuanngussapput, Lene Kristensen taama oqarpoq.
Ujarassiooq nassuiaavoq qaqqaq malugisaatit atorlugit nakkutigineqartoq, taakkulu qaqqap qaavani iluanilu inissisimapput, quppallu alliartornerata sukkassusianik uuttortaanermut atorneqarlutik.
Pisortaqarfiup qaqqap sisoornissaata siulittuutiginissaanut piumasaqaateqarnermini pingaartumik Schweitzimi Italiamilu qaqqat sisoorsimanerinik misilittagaqarfigineqartut tunngavigai. Ujarassiooq naapertorlugu qaqqap sisuunnginnerani nikikkiartornera sukkatsittarpoq.
Ujarassiooq naapertorlugu, nunap sajuppillarujussuarneratigut kalerriutigineqanngitsumik qaqqat sisoorsinnaasarput. Qaqqarlu sisuussappat nunap sajunnera richterskalamik uuttorlugu 6 sinnerlugu sakkortussuseqartariaqartarpoq, ujarassiooq taama oqarpoq, tamannalu Norgemi qaqutigoortuilussuusoq aamma oqaatigaa.
- Qaqqat sisoornissaannik kalerriutigineqartut arlallit pisimapput, qaqqallu sisoornerinik kalerriutigineqanngitsunik pisoqarsimanani, Lene Kristensen taama oqarpoq.
- Pisarsimasut eqqarsaatigalugit quppani taamatut pisoqartarnera arlaleriarlugu takuneqartarsimavoq: Quppaq paasineqarpoq, taava alliartussaaq, isasuunnginnerminilu nikikkiartornera sukkatsittarluni, Lene Kristensen taama oqarpoq.
Qaqqanik taamatut nakkutilliineq Nunatsinni aamma atorneqarsinnaanersoq Lene Kristensenip oqaaseqarfigerusunngilaa. Oqaatigaali NVE-p periaaseq alla atornerulersimagaa, tassalu qaammataasamit paasissutissat atorlugit qaqqani quppanik nakkutilliineq, periaasermi taanna pisariunnginneruvoq qaqqami atortorissaarutinik ikkussuinissaq pisariaqanngimmat.
