Norgemi meeqqat piitsut amerleriarput

Qitiusumik misissuisarfiup -p nalunaarutaani piitsuussusermik taasartik nassuiarniarlugu, ilaqutariit sisamanik inuttallit, tassa angajoqqaat marlunnik meerallit, akileraarutit akilereerlugit, Norgimiut aningaasaannik ukiumut 350.000 koruunit ataallugit isertitaqartartut tamaasa ilanngussimavaat.

Aningaasat taama amerlatigisut nunarsuatsinni nunani assigiinngitsuni piitsuussutsimut takussutissaanatik pissarissaarnermut takussutissaapput.

Maannali Norge nunarsuatsinni nunat pisuunerpaat ilagimmassuk, piitsuussusermik taaneqartup qaffariarnera qanoq nassuiaatissaqartippaat? Qitiusumik misissuisarfimmi immikkoortortami pisortap ilisimatuup Tone Fløtten-ip taama paasiuminarnerarpaa.

- Piitsuussutsip qaffariarneranut pissutaanerpaasoq tassaavoq, ilaqutariit suliffissarsiortunik inersimasortallit amerleriarnerat. Meeqqat suliffeqanngitsunik angajoqqaallit affangajaat piitsuupput. Ilaqutariilli piitsuusut meerartallit piffissaq sivisunngitsoq atorlugu piitsuussusertik anigorsinnaasaraat, Tone Fløtten Norgimi aviisimut Aftenpostenimut oqarpoq.

Taassuma suliffiata naatsorsuinera tassa najoqqutaralugu, Norgimi meeqqat 100.000-it missaat piitsuullutik inuupput.