Norgemi angutit Al-Qaedamut ilaasortaasorineqartut tigusarineqarput
Angutit pingasut pinerliinissaminnik pilersaaruteqartutut pasineqarlutik Norgemi tigusarineqarput.
Allattoq Jaaku Lyberth
juulip 08-at 2010 08:10
Nutaarsiassaqartitsiviup AP-ip tusagassiaa malillugu pasineqarlutik tigusarineqartut al-Qaeda-mut ilaasortaanasorineqarput, imminnut toquutigalutik qaartartumeerinissaminnik pilersaaruteqarsimasutut pasineqarput, soorlu Al-Qaeda New Yorkimi Tuluillu nunaanni taamaaliortareersimasoq.
Angutit pingasut tigusarineqartut USA-mit Norge-milu ukioq ataaseq sinnerlugu alaatsinaanneqarput.
Pinerliiniartutut pasineqarlutik tigusarineqartut, Norgemut nunanulluunniit allanut pinerliiniarlutik pilersaaruteqarnersut suli paasineqanngilaq.
Norgemi politiit isertortumik paasiniaasartui angutit pingasut tigusarineqartut pillugit maannakkkorpiaq tusagassiortunik katersortitsipput.
