Aaveq Freya qaammatini arlaqartuni inuppassuarnit alutorsaatigineqarpoq, ilaatigut umiatsiaaqqani umiatsiani gummibådenilu eqqissisimaartoq takuneqartarluni.Assi: Tor Erik Schrder/Ritzau Scanpix

Norgemi aaveq tusaamasaq toqunneqartariartoq

Aaveq Freya sapaammi ullaakkut Aalisarnermut Naalakkersuisoqarfimmiunit toqunneqarmat annertuuliuutigineqanngilaq.

Aaveq Freyamik atserneqarsimasoq apriilimili Norgemi Oslofjordenimiitoq norgemiorpassuarnillu nuannarineqartorujussuanngorsimasoq toqunneqartariaqarsimavoq.

Norgemi aalisarnermut naalakkersuisoqarfik sapaammi tusagassiuutinut nalunaaruteqarluni taama paasissutissiivoq.

Norgemi innutaasut aavermut qanillattorpallaarnerat pissutigalugu, Norgemi aalisarnermut naalakkersuisoqarfik aalajangerpoq aaveq toqunneqassasoq.

Ajoqusertoqarsinnaanera aarleqqutigineqarmat aaverlu peqqinngimmat sapaammi ullaakkut  toqunneqartariaqarsimavoq.

- Tamakkiisumik nalilersuisoqareermat pasineqarpoq inuit inuunerat peqqissusiallu ulorianartorsiortinneqarsinnaammat toqunneqarnissaa aalajangiunneqarpoq, aalisarnermut pisortaq Frank Bakke-Jensen oqarpoq.

Aaveq Freya qaammatini kingullerni Oslop kangerliumarngata kangisinnerusortaani aamma kippasinnerusortaaniippoq.

Aarrup uippakajaalinnginnissaa pillugu qanillinaveersaarnissaa oqartussaasunit kaammattuutigineqartuaraluarpoq.

Aarrup allamut nuunneqarnissaa Aalisarnermut naalakkersuisoqarfiup isumaliutigisimagaluarpaa, aarrulli nuunneqarnissaa ulorianarpallaassaasoq nalileqarsimavoq.

Aarrup Freyap toqunneqarnissaa sioqqullugu Norgemi innuttaasut oqallipput, ilaasa uumaannaqqugaat ilaasalu toqunneqartariaqartoq oqallillutik

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl