Norgemi aamma taarsiiffigitittoqarpoq
Biskoppi Georg Müller Norgemi Trondheimimi ilagiinni katuullini nalinginnaasumik palasiugaluarpoq, nukappiaraq erinarsoqatigiinniittartoq atornerlukkamiuk. Tamanna ukiut 20-t matuma siornagulli pisimagaluarpoq, suliassarli aatsaat maanna saqqummerluni.
Atornerlunneqarsimasup, maanna inersimasunngortup, atornerlunneqarsimanini katuullit palasiannut siorna ullut ilaanni oqaluttuaraa, taamaalillutillu suut tamarmik aallartinneqarlutik, Norgemi aviisit ilaat Adresseavisen taama allappoq.
Suliassaq ilagiit iluanni misissorneqarpoq Vatikanilu misissuinermi aamma peqataalluni. Atornerlunneqartup politiit akuliunneqarnissaat kissaatiginngilaa.
Müller tamatuma nalaani biskoppinngorpoq, unnerluussutigineqartunillu qanimut paasitinneqarami atornerluisimanini nassuerutigalugu. Siorna juunimi oqaluttarfimmiit nammineerluni atorfimminit erniinnarluinnaq tunuarniarluni nalunaarpoq. Tunngavilersuuta tassaavoq ilagiinnik suleqateqarnermi ajornartorsiuteqarneq.
Maannali tassa pissuterpiaasoq saqqummerpoq. Adresseavisenip aamma paasisimavaa Norgemi ilagiit katuullit atornerlunneqarsimasoq aperisimagaat taarsiivigineqarnissamini suna kissaatigineraa. Ukioq naallugu akissarsiat norskit kroninngorlugit 400.- aamma 500.000 kronit akornanniittut kissaatigai, pissarsiaralugillu.
Trondheimimi Oslomilu maannakkut katuullit biskoppiata Bernt Eidsvigip taarsiissutit qanoq amerlatiginerat uppernarsarumanngilaa, oqarlunili taarsiissuteqartarneq nalinginnaasuusoq.
Biskoppi suliunnaarsinneqartoq ilagiinni katuullini atorfinissinnaajunnaavissaaq. Taanna nassuiaavoq taamaallaat nukappiaqqamik erinarsoqatigiinniittartumik ataasiaannarluni atornerluisimalluni.
Nunani assigiinngitsorpassuarni ilagiit katuullit meeqqanik kinguaassiuutitigut atornerluinertigut assuarnartuliornernut maannakkorpiaq akiuupput. Eqqartuussissuserisoq Italiamiu ippassaq oqarpoq suliassat ukiuni kingullerni qulini saqqummersimasut suliassat ilaannaminiinnannguarigaat. Taanna nammineerluni isumaqarpoq 1999-ip kingornagulli Italiami palasit meeqqanik kinguaassiuutitigut atornerluisarsimaneri pillugit suliassat 130-t sinneqartut uppernarsarsinnaallugit, DR-imi taama ilanngutassiipput.
