Norge-mi takornariat marluk qiullutik ajunaartut

Norge-mi takornariat Skotland-imeersut marluk qiullutik ajunaarsimapput. Pingajuat qiungajaveqqasoq nassaarineqarluni annappoq. Røde kors-imi sulisut Bergen-ip kangisinnerusortaani alapernaarsuitillutik nalaatsornerinnakkut takornariat nassaarineqarsimavaat. Ulluni arlalinni silarlussimavoq, Norge-milu politiit aviisimut Aftenposten-imut oqaluttuarsimapput, takornariat pingasut maqaasineqarsimasutut nalunaarutigineqasimanngitsut. Pingajuat annattoq, tikikkuminaatsumi nassaarineqartoq, qamuteralannik assartorlugu napparsimavimmut qaninnerpaamut ingerlanneqarsimavoq. Røde kors-imi sulisut 20-it missaanniittut ulluni qulingiluani ajunaaartut nassaarineqarfiata eqqaani pikkorisarnerminnut atatillugu alapernaarsuitillutiik takornariat nassaarisimavaat. Norge-mi annaassiniarnermik suliaqartut nalunaarutigaat, ulluni arlalinni silarlussimasoq, takornariallu tammarsimasassasut ikiortissarsiorsinnaasimanatillu. Annattutuaq oqaluttuarsimavoq, tallimaallutik ingerlaaqatigiissimagaluarlutik ullulli marluk sioqqullugit avissaarsimallutik. Takornariat sinneri marluk ullup ingerlanerani illuaqqamiittut ajunngitsut nassaarineqarsimapput.