- Norge aamma taamaasiortarpoq

Cairn Energyp aasaq manna Nunatta sineriaani uuliamik misiliilluni qillerinissaanni kemikaaliat inerteqqutaasunik taaneqarsinnaasut 200 tonsit missaanniittut imaanut maqitinneqarsinnaasut qanitukkut Naalakkersuisunik akuersissutigineqarpoq. Aatsitassat pillugit Naalakkersuisup tamatumunnga tunngavilersuutigaa, Norge aamma kemikaalianit taamaattunik imaanut maqititsisarmat, naak Norgemi imaanut maqitinneqartartoq Nunatta sineriaani qillerinermi ataasiinnarmi maqitinneqartartussaq annerugaluartoq.
Allattoq Apollo Jeremiassen
maajip 20-at 2011 13:04

Nunatta sineriaani aasaq manna misiliilluni uuliamik qillerinissat sisamaasut akuersissutigineqartut ingerlanneqalerpata, akuutissaq 45 tonsi qillerinermi ataatsimi imaanut maqitinneqartussaasoq akuersissutaavoq, tamannalu Norgep ukiumut maqitittagaanut sanilliukkaanni aappaata affaanik annertuneruvoq.

Tamassuma assigiinnarpaa, Nunatsinni inuit ataasiakkarlugit eqqarsaatigigaanni akuutissamik ulorianartumik aasaq maannaannaq eqqarsaatigalugu taakku 3,5 kilomik arrortinneqarpiarsinnaanngitsumik anartarfimmut kuutsitsisarpata.

Cairn Energyp imaanut maqitittagassaa annertuvoq siunissarlu isigalugu tamanna akuerineqarsinnaanani, Danmarkimi Avatangiisit pillugit misissueqqissaartarfik misissuereerluni taama nalunaarpoq, Aatsitassanullu Pisortaqarfiup misissuineq nalunaarusiaraa.

Taama akuersissuteqarsimaneq avatangiisit pillugit suliniaqatigiiffiit, Greenpeacep aamma Avatap isornartorsiorpaat. Aatsitassanut Naalakkersusiup, Ove Karl Berthelsenip isornartorsiummut akissuteqarnermini qulequtsiussimavaa 'Kalaallit Nunnaani Greenpeacep nipagiussai', tassani Ove Karl Berthelsenip tunngavilersuutigeqqippai Norgep akuutissat imaanut maqitittagai issuarlugit maani taamaaliortoqarmat. Taama tunngavilersuusiorpoq, naak Norgemi maqinneqartartut arfinileriaammik maanngarnit annikinnerusussaagaluartut.

Cairn Energyp imaanut maqitittagassai akuerissagaanni, Danmarkimi Avatangiisit pillugit misissueqqissaartarfik isumaqarpoq maqitittagassat annikillisinniarlugit Cairn Energy arlaannik iliuuseqartariaqartoq.

Nalunaarusiami atuarneqarsinnaavoq piumasaqaat taamaattoq ilanngullugu allanneqarsimasoq, aammalu Cairn Energyp suliffeqarfiata Capricornip ukiaru septembarip aqqarnat nallertinnagu piumasaqaatip pilersaarusiornera naammassereersimassagaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq