Nordvest-territoriami aqqusinertaassaq periarfissanik nutaanik ammaassissaaq

Inuviup Tuktoyaktukillu akornanni maannamut ukiukkut sikukkuinnaq aqqusineqartarpoq, nutaamilli aqquserngiorneq 2014-miilli aallartinneqarluni. Ataavartumik aqqusineqannginnera pissutigalugu, nunaqarfik Tukkimik aamma taaneqartartoq, timmisartumik umiarsuarmilluunniit taamaallaat tikinneqarsinnaavoq - angalaneq pisariusoq akisoorlu.

Aqquserngiorneq ukioq manna unitsinneqareerpoq, lastbiilit oqimaatsorsuit sulinermi atorneqartut sumiiffiit marluinnaaat atorlugit sikukkut ikaarsinnaammata, taakkulu maanna sikuereersimallutik.

Tuktoyaktuk Nordvest-Territoriami Inuvialuit pigisaanniippoq, innuttaasullu 900-t missaanniittut Inuvialuupput. Inuvik nunap immikkoortuani pisortatiguunngikkaluartumik illoqarfiit pingaarnersaannik taaneqartarpoq.

Merv Grubenip, najukkami niuertup, aviisimut National Observerimut oqaatigaa illoqarfiit marluusut aqqusinermik kilometerinik 120-nik isorartutigisumik atassuserneqarpata ukioq kaajallallugu pilersuisoqalersinnaassasoq takornarianillu amerlanerusunit tikinneqartalissasoq. Akunnittarfimmik, tammaarfimmik neriniartarfinnillu nutaanik pisariaqartitsilissaagut, Merv Gruben aamma oqarpoq.

Tuk allorniusat sanimukartut malillugit Issittup imartaa nalleqqatigalugu inissisimavoq 70-ikkunnilu tamanna uuliasiorfigineqarsimalluni. Uuliasiornerlu maanna aallarteqqinneqarsinnaagunarpoq. Umiarsualiveqareerpoq, taannalu umiarsuarnut Sullualukkoortunut pingaaruteqalersinnaavoq.

Aqqusinertaaq milliardip aappaa avillugu akeqartussaq atorlugu Issittup imartaa angullugu biilertoqarsinnaalissaaq. Tamatumalu malitsigisaanik Canadami imavissuarnut pingasunut ingerlaartoqarsinnaalissaaq, Atlantikumut, Issittup imartaanut Manerassuarmullu.

Aqqusinertaassap 2017-imi aasakkut ammarnissaa naatsorsuutigineqarpoq.