Nordic Fashion Bianalemut piareersaatitut Katuami saqqummersitsineq

Naak aatsaat aappagu ingerlanneqartussaagaluartoq, aammalu Tysklandimi Frankfurtimi ingerlanneqartussaagaluartoq, Nuummi kulturikkut illorsuarmi Katuami marlunngornermi juunip 25-iani piareersaatitut saqqummersitsisoqassaaq. Kalaallit peqataatitassaat marluk saqqummersitsinermilu aaqqissuisut marluk naapissinnaavatit.
Allattoq Peter Troelsen, Simon Uldum
juunip 24-at 2013 09:51

Aaqqissuisut marluusut, Nina Gorfer aamma Sarah Cooper, Bibi Chemnitz, atisanik ilusilersuisartutut ilisarisimaneqarluartoq ingerlalluartorlu Nordic Fashion Bianalemi peqataasussat aappaattut toqqarsimavaat. Kalaallity peqataatitassaata aappaa suli ilisarisimaneqarpallaanngilaq, tassalu Nikolaj Kristensen Upernaviup pigisaani Nuussuarmeersoq, sapangaaqqanik kiuuliliortartoq, aaqqissuisullu tamanna alutorilluinnarsimavaat kalaallillu saqqummersitsinermi peqataatitassaata aappaatut toqqarsimallugu. Saqqummersitsinermi ukiormanna nutaatut nunat avannarliit killiit Island, Savalimmiut Kalaallit Nunaallu kisiartaallutik peqataassapput.

Katuami aaqqissuussineq tuluttut, danskisut, kalaallisullu ingerlanneqassaaq, Katuallu inersuaaraani nal. 19.00 aallartissalluni akunnernillu marlussunnik sivisussuseqassangatinneqarluni. Aaqqissuussinermut iserneq akeqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq