Nordatlantisk Hus atlantikup avannaamiut pillugit ulloqartitsilersoq
Aaqqissuussineq taaguuteqarpoq Opdag Nordatlanten (Atlantikup avannaa paasisaqarfigiuk, aaqq.), ilaqutariinnullu tamanut ilinniagaqaatigaluni nuannisaqatigiinnerussalluni, Nordatlantisk Hus tusagassiorfinnut nalunaaruteqarluni taama allappoq.
- Nordatlantisk Hus atlantikup avannaamiut pillugu ulloqartitsinermut qaaqqusivoq. Ataatsimoorluta oqaluttuarisaanerput meeqqat inersimasullu paasisassarsiorfigisinnaavaat. Misigineqarsinnaasut ilaat tassaapput islandimiut histii, uumasut qivikkat, oqaluttuatoqqanik atuffassineq, ini nunat atlantikup avannaamiut pillugit qiortaallunilu nipititeriffik, atlantikup avannaamiut kaagiliaat, oqaluttuarisaanerput pillugu paasissutissanik ujarlertitsineq nuannersunik pinnattaassaqartitsiffiusoq, allarpassuillu, Nordatlantisk Hus taama allappoq.
Nunat atlantikup avannaamiut ilisimaqarfiginerulernissaat anguniaraa
Sammisaqartitsinermik aaqqissuisuuvoq Nordatlantisk Husimi ilinniartuusoq, Aviaja Uldum. Taanna kulturilerinermik sammisaqartitsinermillu immikkut sammisaqarluni ilinniarfimmi Erhvervsakademiet Lillebæltimi serviceøkonominngorniartuuvoq.
- Nunat atlantikup avannaamiut pillugit ilisimasat ilaatigut killeqarsinnaasarput, taamaammat tamanna aallaavigalugu aaqqissuussivunga. Kalaallit Nunaata, Savalimmiut Islandillu nuannisaqatigiinnikkut ilinniarnikkullu ilisimasaqarfiginerulernissaat siunertaavoq, Aviaja Uldum taama oqarpoq.
Sumi qaqugulu: Nordatlantisk Hus, Nordatlantisk promenade 1, 5000 Odense, pingasunngornermi oktobarip 19-iani 2016, nalunaaqutaq 13.00-17.00.
Peqataaneq akeqanngilaq.
Quppersagaq pilersaarutinik imaqartoq ataani takuuk: