Nunarsuarmi tamarmi teknologimi suliffeqarfinnillu allanngortiterisarnernikkut ineriartupiloornermut Imarpiup Atlantikup avannaanut nunat sineriallit qanoq peqataassappat?
Apeqqut tamanna Imarpiup avannaani suleqatigiiffimmi NORA-mi ilaasortaasut ataatsimeeqatigiinneranni akilinermi Labradorimi pisussami oqaluuserineqassaaq, ataatsimiinnermullu nunatsinneersut arfineq pingasut peqataassapput.
NORA-p Labradorimi ataatsimeeqatigiissitsineranut nunatsinnit peqataasussanut ilaapput Inatsisartunut qinikkat marluk tassa Ruth Heilmann Siumumeersoq Marie Fleischerilu Demokraatineersoq.
Nunat NORA-p ataatsimiisitsineranut peqataatitaqartussat tassaapput, Nunarput, Savalimmiut, Island, Canada, Norge Skotlandilu. Inuussutissarsiutit pingaaruteqarlutillu ataatsimoorutigineqartut, tassalu aalisarneq, takornariaqarnerlu ataatsimiinnermi aamma oqaluuserineqassapput, kiisalu pisortat aqutaanni nuttartarnerit aamma eqqartorneqassallutik.