Ataatsimiititaliarsuaq: Noqqaassutigineqareersorlu inuttalerneqartussanngorpoq

Aalisarnermut ataatsimiititaliarsuup suli pilersinneqanngimmat utaqqikatattoqarlunilu paatsuungasoqarpoq. Kisianni sulineq februaarip qiteqqinnerani aallartissinnaasoq, aalisarnermut naalakkersuisoq neriorsuivoq.
Assi © : KNR // Anton Gundersen Lihn
Allattoq Marie Kûitse Kristensen
februaarip 01-at 2019 09:48

Aalisarneq pillugu ataatsimiititaliarsuup 2009-mi isumaliutissiissutaa politikikkut assortuussutaasoq saqqummiunneqareersorlu aalisarneq pillugu nutaamik ataatsimiititaliarsualiornissaq noqqaassutaalerpoq. 

Inuit Ataqatigiillu maanna nukingisaaripput. 

- Inuussutissarsiummik taama aningaasarsiornikkut inuiaqatigiillu ineriartorneranni pingaaruteqartigisumik nalornineq, uninnganeq alloriarnaveeqqanerlu naalakkersuisunit akisussaaffittut tiguneqartariaqarpoq, Inuit Ataqatigiit aalisarneq pillugu oqaaseqartartuat Aqqaluaq B. Egede taama oqarpoq. 

AAMMA ATUARUK Naalakkersuisut aalisarneq pillugu ataatsimiititaliarsuarmik suli pilersitsinngitsut

Naalakkersuisoqatigiit, Demokraatit Inuit Ataqatigiillu aningaasanut inatsit pillugu isumaqatigiissutaat napertorlugu
ataatsimiititaliarsuaq aalisarnermi siuarsarniarlugu, taavalu aalisarnerup aalisakkallu inuiaqatigiinnut tamakkiisumik iluaqutaanissaannik siunnersuuteqassaaq.

Ataatsimiititaliarsuassallu pilersinniarnerata sivitsoruttornera, aalisarnermut naalakkersuisup nassuerutigaa.  Februaarilli qiteqqunnerani inuttalerneqarnissaa naatsorsuutigalugu, taanna oqarpoq.

- Kisianni naammaasiliivittutut oqaatigineqarsinnaavoq, peqqutaavoq partiit naalakkersuisooqatigiittut siuttuisa qanoq isumaqarfigineraat, Aalisarnermut naalakkersuisoq, Nikkulaat Jerimiassen KNR-imut taama oqarpoq. 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk