Noah-p umiarsua ilaarnialerpaat

Nunarsuaq aserussagaluarpat, soorlu Kalaallit Nunaanni sermersuaq aalluni, sikuiuitsumiluunniit kujallermi sermersuaq aalluni, imaluunnit silaannarsuarmiit ulloriat anaat nunarsuatsinnut tulluni, atomilluunniit nukinga atorlugu qaartitsisoqarluni suna tamarmi aserussagaluarpat, piareersimaniarluni Norskit naalakkersuisui 17 million koruuninik naatsiiassanik toqqorsinissamut aningaasaliinialerput.

Soorlu uumasorpassuit naatitassallu Noah-p umiarsuani iliorarneqarsimasut, suliniullu Noah-p umiarsuanut assingusoq Norskit anguniarpaat.

Sikuiuitsup avannarliup qanittuani toqqorsivigineqarlersussaq tassaavoq, Svalbard. Qaqqarsuit ilaanni sullorsualiornikkut naatsiiassanik toqqorsiviit pilersinneqassapput. Toqqorsivissallu arlalissuit 375 kvadratmiiterisut annertutigisukkaartut sananeqassapput.

Sermersuaq aappat nunarsuarmi imaq 7 miiterinik qaffasinnaavoq. Aamma sikuiuitsoq kujalleq aassagaluarpat, nunarsuarmi imaq 61 miiterinik qaffassinnaavoq. Taamaammat naatsiiassat assigiinngitsut 3 millionit nunarsuarmi tamaneersut Svalbard-imi qaqqarsuit ilaanni 130 miiterisut portutigisumiittumut toqqorternissaat Norgemi naalakkersuisunit suliniutigineqarpoq. Sullorsualiornissaq qaammatip tulliani aallartinneqassaaq, naatsorsuutigineqarporlu toqqorsivissuaq aappagu naammassineqarsimassasoq.