Niviarsiaraq tallimanik ukiulik aallartoorfigineqartoq

Upernaviup eqqaani Tasiusami niviarsiaraq tallimanik ukiulik aallaammik talimigut aallartoorfigitissimavoq. Tamanna ippassaq sisamanngornermi pisimasoq, Qeqqata Qaasuitsullu politiivini regionslederi Johan Davidsen ilisimatitsivoq.

- Meeqqat aallaammik pinnguarneranni niviarsiaraq aallartoorfigitissimavoq, Johan Davidsen KNR-imut oqarpoq.

Niviarsiaraq tallimanik ukiulik ippassaq Upernavimmit Nuuliaanneqarpoq. Nuummi suliaritereerluni maanna tallimanngornermi ulaap tungaani Danmarkiliaanneqartoq Johan Davidsen ilisimatitsivoq.

- Danmarkimut maanna ingerlaarpoq. Napparsimmaveqarfimmit ilisimatinneqarpugut niviarsiaraq inuunerminik ulorianartorsiunngitsoq, Johan Davidsen oqarpoq.

Taassuma aamma oqaatigaa pisoq Upernavimmi politiinit misissuiffigineqaleruttortoq.

- Misissuinitta takutissavaa qanorpiaq pisoqarsimanersoq, Johan Davidsen naggasiivoq.

AAMMA ATUARUK Aallaasit parnaaqqasumiitinnissaat oqallisigineqartariaqarpoq

AAMMA ATUARUK Sakkut pillugit inatsit Naalakkersuisut sukaterniaraat