Niviarsiaqqat atornerlugaasimasut oqqiffissaqalerput

Qaasuitsup Kommuniani niviarsiaqqanut atornerlugaasimasunut Naalakkersuisut 200.000 koruuninik aningaasaliissuteqaqqammerput, ingerlatarlu Qaasuitsup Kommuniani meeqqanut atornerlugaasimasunut ikiuiniarnermik suliaqartoq, kaperlakkiartorluni taartorsuarmut pulajartortumut kusanassutsimik sikkilersitsinermik pilersitsiffiuvoq.

- Niviarsiaqqat katersuuttarfiat atornerlugaasimasut kisimik katerittarfiattut paasineqassanngilaq. Katerittarfik siammasissuuvoq, meeraanermiit kissalaartumik paaqqutarineqarsimanngitsut ornittagarivaattaaq. Taamaattumik kinguaassiutitigut atornerlunneqarsimasunut kisimik katersuuttarfiuneranik oqarneq eqqoqqissaanngilaq, Inge Staub Nielsen Qaasuitsup Kommuniani tarnip pissusaanik immikkut ilisimasalittut atorfilittani marluusut aappaat knr.gl-mut oqarpoq.

Niviarsiaqqat katerittarfiat Qaasuitsup Kommuniani ukioq manna aallartinneqarpoq. Qaanaami tarnip pissusaanik immikkut ilisimasalinnik annertuumik amigaateqartoqartoq paasinarsineqarpoq. Tassani meeqqat kinguaassiutimikkut atornerlugaasimasunik ikiuigasuarnissamik pisariaqartitsisoqartoq paasineqarpoq. Tamanna tunuliaqutaralugu februaarip qaammataagaa Qaasuitsup Kommuniata Qaanaami niviarsiaqqanut ataatsimoortarfik pilersippaa, katerittarfillu 10.000 koruuninik aningaasaliiffigalugu.

Katerittarfik oqallittarfiutigaluni misigissutsinik aniatitsiviusarpoq, tassani niviarsiaqqat kinguaassiutitigut atornerlugaasimanerminnik annissuinissaminnut periarfissaqartalutik. Taamaasillutillu inuttut imminut suliarinermut, siunissamullu ingerlariaqqinnissamut periarfissiinerulluni. Inge Staub Nielsenip oqarneratut, katersuuttarfik ikioqatigiiffiuvoq kinguaassiutitigut atornerlunneqarsimasunut, taamaasilluni siunissami eqqarsartaatsikkut innarlerneqarsinnaaneq pinngitsoorneqarsinnaaniassammat, siunissamullu aqqutissiusseqataasinnaalluni.

- Toqqaannartumik ataatsimoortarfiit aningaasaliiffigineq ajorpavut, unnussiuaarnissamulli arlaannilluunniit aaqqissuussiniarnernut. Soorlu aallaarsimaarnernut assassugassanulluunnniit atortussarsiutinut pisitittarpavut, kingusinnerusukkulllu aningaasat pisissutigisimasat Kommunimiit utertinneqartarlutik, Inge Staub Nielsen oqarpoq.

Niviarsiaqqat ataatsimoortarfiat arfineq marluk missaannik meerartaqakkajuttoq, ataatsimik ikorfartorfeqartarpoq. Taanna ilinniartitsisutut atorfeqarsinnaavoq inunnilluunniit siunnersortaasinnaalluni, Inger Staub Nielsenillu oqarneratuut Qaanaami niviarsiaqqanut katersuuttarfik ingerlalluarpoq, februaarillu aallartilaarnerani katerittarfiup aallartinnerani Kommuneqarfimmiit 10.000 koruuninik tapiiffigineqarnikuulluni. Maannamut ingerlanerminni aningaasat tapiissutaasimasut nungukkiartulerput.

Qujanartumilli Naalakkersuisut aningaasanik tapiinermikkut, niviarsiaqqanut katerittarfik ingerlaannernissaa qulakkeerneqarpoq.

Pilersaarutigineqarpoq Qaasuitsup Kommuniani illoqarfinni tamaginni arfineq pingasuusuni niviarsiaqqat katerittarfissaannik pilersitsisoqassasoq, maannamullu nivarsiaqqat katerittarfii illoqarfinni marlunni pilersinneqarsimapput, tassalu Qaanaami Qasigiannguanilu. Naalakkersuisut 200.000 koruunit tapiissutigisaat niviarsiaqqat ataatsimoortarfiinut atorneqassapput, niviarsiaqqallu katersuuttarfiinik pilersitsinikut kisimik 25.000 koruuninik tapiiffigineqarsinnaapput.