Niviarsiaq timersortartoq haship silarsuaanut alakkarterivoq
Namminersorlutik Oqartussat pitsaaliuinermut immikkoortoqarfiat Paarisa ikiaroornartoq hash akiorniarlugu suliniummik aallartitsivoq.
- Paasititsiniaanikkullu angajoqqaat aanngajaarniutinik atuineq pillugu meeqqaminnik oqaloqateqarnissaannut tunngavissinneqassapput, taama Paarisamit Berti Bourup nalunaarpoq.
Assammik arsarnermi volleyballimi inuusuttuni nunanut allanut unammisartuniittoq Ivâna siuuttoralugu apeqqutit hash-imut tunngassuteqartut qaqilerneqartassapput.
- Ivâna ikinngutini, nalunngisani inuiaqatigiillu aqqutigalugit hashimik ta-kutinneqakkajuttarpoq. Tamanna eqqumiigivaa namminerlu oqaatsini atorlugit nassuiaalluni paasititsiniaanikkut sammisaq misissorniarlugu. Taama iliussaaq inuit imminut isiginnaartartunullu paasissutissiilluarsinnaasut arlallit apersornerisigut, taama Paarisamit nalunaarput.
TV-kkut takutitassiat naatsut arfineq marluk sananeqassapput KNR-mi inuiaqatigiinnut paasissutissiinertut takutinneqartassallutik. Aammattaaq Nuuk TV-mi nutaarsiassat kinguninngua takutinneqartassapput.
